Qazaqstan munaı-gaz hımııasyndaǵy óndiristi 2 ese arttyrady
ASTANA. KAZINFORM – Búgin elordadaǵy «QAZMUNAIGAZSERVIS-2026» konferentsııasynda QR Energetıka mınıstrliginiń Munaı-gaz-hımııa jáne tehnıkalyq retteý departamentiniń dırektory Temirlan Úrkimbaev munaı-gaz hımııasy salasyndaǵy strategııalyq basymdyqtardy tanystyrdy.
Sektordy damytýdyń negizgi baǵyty – shıkizatqa táýeldilikten arylyp, qosylǵan quny joǵary ónim óndirýge kóshý. QR Energıtka mınıstrliginiń málimetine qaraǵanda, keıingi jyldary salada turaqty ósim baıqaldy: munaı-gaz hımııasy ónimderiniń kólemi 2023 jyly 358 myń tonna bolsa, 2025 jyly 619 myń tonnaǵa jetken. Bul kórsetkish 2030 jylǵa qaraı 1 220 myń tonnaǵa jetedi dep josparlanǵan.
Bul ósimniń negizin iri ınvestıtsııalyq jobalar quraıdy. 2022 jyly Atyraýda polıpropılen óndiretin alǵashqy ıntegratsııalanǵan gaz-hımııa kesheni KPI iske qosyldy. Onyń óndiris kólemi 2025 jyly 375 myń tonnaǵa jetken.
Temirlan Úrkimbaevtyń aıtýynsha, el tarıhyndaǵy eń iri jobalardyń biri – jylyna 1,250 mln tonna polıetılen shyǵaratyn «Polıetılen» zaýytynyń qurylysy belsendi júrip jatyr. Atalǵan zaýytty iske qosý 2029 jylǵa josparlanǵan. Sonymen qatar Pavlodar oblysynda alkılat óndiretin zaýyt salynyp jatyr. Budan bólek, karbamıd (880 myń tonna) jáne býtadıen (340 myń tonna) óndirý jobalary da qatar júzege asyrylyp jatyr. Munaı-gaz hımııasyn damytýdyń 2030 jylǵa deıingi Jol kartasy aıasynda negizgi tórt iri jobaǵa salynatyn ınvestıtsııanyń jalpy kólemi 12 mlrd AQSh dollary. Bul shamamen 2,4 myń turaqty jumys ornyn ashýǵa múmkindik beredi.
Mınıstrlik munaı-gaz hımııasy salasyndaǵy zańnamalyq retteýdi kúsheıtýge jáne jergilikti qamtýdy damytýǵa erekshe nazar aýdaryp otyr. Qazirgi ýaqytta «Munaı-gaz hımııasy ónerkásibi týraly» zań jobasy ázirlenip jatyr. Bul zań kásiporyndarǵa shıkizat bazasyna teń qoljetimdilikti qamtamasyz etýge, jańa ınvestıtsııalar tartýǵa jáne salanyń turaqty damýyn qoldaýǵa baǵyttalǵan.
Sondaı-aq, otandyq kompanııalardy iri jobalarǵa tartý jáne halyqaralyq standarttarǵa sáıkes jumys isteý úshin arnaıy Jumys toby quryldy. Bul top Ispanııalyq Tecnicas Reunidas jáne Italııalyq Maire Tecnimont sııaqty halyqaralyq EPC-merdigerlermen yntymaqtastyqty úılestirip, jobalardy tıimdi júzege asyrýǵa jaǵdaı jasaıdy.
Osy yntymaqtastyq aıasynda kadrlardy daıarlaý baǵdarlamalary iske qosyldy. 2025 jyldyń shilde aıynan bastap 35 qazaqstandyq túlek Ispanııada oqyp jatyr. Sonymen qatar, Maire Tecnimont kompanııasymen seriktestik negizinde Qazaqstanda TMD men Kavkaz elderine qyzmet kórsetetin óńirlik ınjenerlik-ónerkásiptik hab qurylyp jatyr.
Bul bastamalar elde turaqty ınjenerlik kadrlyq áleýet qalyptastyrýǵa jáne munaı-gaz hımııasy salasynyń tehnologııalyq táýelsizdigin qamtamasyz etýge múmkindik beredi.
Aıta keteıik, buǵan deıin Energetıka mınıstri Erlan Aqkenjenov Úkimet otyrysynda munaı-gaz hımııasy týraly zań jobasy qashan Parlamentke engiziletinin aıtty.