Qazaqstan munaı eksporty men tasymalyna arnalǵan tarıfterdi memlekettik retteý sharasyn alyp tastaýdy usynady
ASTANA. 1 qazan. QazAqparat - Qazaqstan munaı eksporty men tasymalyna arnalǵan tarıfterdi memlekettik retteý sharasyn alyp tastaýdy usynady. Búgin QR Premer-Mınıstri Serik Ahmetovtiń tóraǵalyǵymen ótken Úkimet otyrysynda osyndaı másele kóterildi.
Atalǵan qyzmetterdi retteýdiń qazaqstandyqtarǵa esh áseri bolmaıtyndyǵyn basa aıtqan «Samuryq-Qazyna» UÁQ» AQ basqarmasynyń tóraǵasy Ómirzaq Shókeev. «Eń basty másele - halyqty qyzmetterdiń qymbattaýynan qorǵaý. Al oǵan eksporttyń qandaı qatysy bar? Bul qyzmet berýshiler men jer qoınaýyn paıdalanýshylar arasyndaǵy kelissózder máselesi. Tasymaldaý munaı baǵasynyń 3-5 paıyzyn ǵana quraıdy», - dedi.
Óz kezeginde elimizdiń Tabıǵı monopolııalardy retteý agenttiginiń tóraǵasy Murat Ospanov ózi basqaratyn vedomstvonyń munaı eksporty tarıfteriniń erkin bolǵandyǵyn jaqtaıtyndyǵyn jetkizdi. Degenmen onyń sózine qaraǵanda, bul máseleniń sheshimi Eýrazııalyq ekonomıkalyq komıssııaǵa táýeldi bolyp otyr. «Búginde gazdy eksporttaý jáne tasymaldaý rettelmeıdi. Biz mundaı usynysty munaıǵa da qatysty jasaǵan edik. Biraq Eýrazııalyq ekonomıkalyq komıssııa osyndaı talap qoıyp otyr. Olar oǵan yqpal jasaǵylary, eksport jáne tasymaldy rettegileri keledi. Biz eksport pen tasymaldyń rettelmegendigin jaqtaımyz», - dedi ol.
Osy oraıda Úkimet basshysy S.Ahmetov Eýrazııalyq ekonomıkalyq komıssııadaǵy qazaqstandyq ustanym naqty bolýy kerektigin nyqtaı aıtyp, óziniń orynbasary Qaırat Kelimbetovke qazaqstandyq sarapshylarmen birlesip, atalǵan máseleni egjeı-tegjeıli qarastyrýǵa ári sáıkesinshe sheshim engizýge tapsyrma berdi.
