Qazaqstan munaı eksportyn Baký jáne Sýpsa arqyly júzege asyrýdy qarastyryp jatyr
ASTANA. KAZINFORM – Kaspıı qubyr konsortsıýmynyń (KQK) shilde aıynda munaı qabyldaýdy ýaqytsha shekteýine baılanysty Qazaqstan munaıynyń bir bóligi eksporttyń balama baǵyttaryna qaıta baǵyttaldy. Bul týraly QR Energetıka mınıstriniń keńesshisi, mınıstrliktiń resmı ókili Ásel Serikpaeva málimdedi.
Onyń aıtýynsha, munaı Aqtaý portyna, Atasý – Alashańqaı baǵytyna, sondaı-aq Atyraý – Samara baǵytyna jóneltilgen.
– Qosymsha eksport baǵyttary retinde Baký – Tbılısı – Jeıhan júıesi arqyly tasymaldaý, Kaspıı teńizi arqyly Ázerbaıjan aýmaǵyna jetkizý, sondaı-aq Baký – Sýpsa baǵyty qarastyrylyp jatyr, – dedi Ásel Serikpaeva.
Qazirdiń ózinde Baký – Tbılısı – Jeıhan júıesi arqyly jylyna shamamen 1,2 mln tonna qazaqstandyq munaı tasymaldanady.
– Bul rette Ázerbaıjan tarapy Qazaqstan munaıyn qabyldaý kólemin jylyna 2,2 mln tonnaǵa deıin arttyrýǵa daıyn ekenin bildirdi, – dep tolyqtyrdy mınıstrlik ókili.
Aıta keteıik, buǵan deıin, Energetıka mınıstrligi KQK jumysy tolyq toqtaıdy degen aqparatty joqqa shyǵarǵan bolatyn.
