Qazaqstan ustaz bedelin nyǵaıtý boıynsha álemde ekinshi orynda tur
ASTANA. KAZINFORM — Qazaqstan muǵalimderdiń bedelin nyǵaıtý kórsetkishi boıynsha álemde ekinshi orynda tur. Sondaı-aq ustazdardyń 95 paıyzy eńbekaqysyna qanaǵattanatynyn, al 80 paıyzy — muǵalim mamandyǵyn qaıta tańdaýǵa daıyn ekenin aıtqan. Bul týraly Memleket basshysy Qasym-Jomart Toqaev respýblıkalyq Tamyz konferentsııasynda málimdedi.
Prezıdent ustazdyń bedelin nyǵaıtyp, olardy jan-jaqty qoldaý úshin belsendi jumys atqarylyp jatqanyn jetkizdi.
«Pedagog mártebesi týraly» arnaıy zań qabyldandy. Bıyl bul zańǵa tolyqtyrý engizilip, ustazdarǵa qosymsha quqyqtyq jáne áleýmettik kepildikter berildi.
5 qazan kúni ustazdardyń kásibı merekesi retinde naqty bekitildi. Memlekettik marapattar tizimine «Qazaqstannyń eńbek sińirgen ustazy» ataǵy engizildi.
— Bul mártebeli nagradamen marapattalǵan tulǵalarǵa qomaqty syıaqy berilip jatyr. Qazirdiń ózinde 100-ge jýyq muǵalim marapattaldy. Basqa da laıyqty ustazdar memleket nazarynan tys qalmaı, osy qurmetti ataqqa ıe bolary kúmánsiz. Sońǵy úsh jylda elimizdegi 3 muǵalimge eń joǵary memlekettik nagrada — «Qazaqstannyń Eńbek Eri» ataǵy berildi. Bul ustazdar qaýymyna degen aıryqsha qurmettiń belgisi ekeni sózsiz, — dedi Memleket basshysy.
TALIS-2024 (The OECD Teaching and Learning International Survey) zertteýiniń nátıjesine sáıkes, Qazaqstan muǵalimderdiń bedelin nyǵaıtý kórsetkishi jóninen ekinshi orynda tur.
— Sondaı-aq ustazdardyń eńbekaqyǵa qanaǵattaný ólshemi boıynsha elimiz álemdegi alǵashqy bes memlekettiń qataryna kiredi. Atap aıtqanda, ustazdardyń 95 paıyzy óz jumysyna kóńili tolatynyn aıtqan. Al 80 paıyzy osy mamandyqty qaıta tańdaýǵa daıyn ekenin jetkizgen. Barshańyzǵa zor alǵys, — dedi Prezıdent.
Buǵan deıin Prezıdent elimizdegi mektep qurylysyn jandandyrýdy tapsyrǵan edi.
