Qazaqstan muǵalim mamandyǵynyń qoǵamdyq bedeli boıynsha álemde ekinshi orynda — mınıstr
ASTANA. KAZINFORM — Qazaqstan muǵalim mamandyǵynyń qoǵamdaǵy bedeli boıynsha álemde ekinshi orynǵa ıe. Sonymen qatar elimiz pedagogterdiń eńbekaqysyna qanaǵattaný deńgeıi eń joǵary bes memlekettiń qataryna kiredi.
Bul týraly Oqý-aǵartý mınıstri Juldyz Súleımenova Astanada ótken Global Businesswomen Council uıymynyń IV plenarlyq otyrysynda málimdedi.
Mınıstrdiń aıtýynsha, áıelderdiń ekonomıkalyq múmkindikterin keńeıtý eń aldymen bilim berý sapasymen, adamı kapıtaldyń damýymen, ekonomıkanyń turaqty ósimimen jáne eldiń básekege qabiletimen tikeleı baılanysty.
— Búginde Qazaqstannyń bilim berý júıesindegi pedagogterdiń 80% astamy — áıelder. Olar kún saıyn óskeleń urpaqty oqytyp, tárbıeleıdi, balalardyń bilim alyp, daǵdy qalyptastyrýyna, tártipke, jaýapkershilikke jáne eńbekke qurmetpen qaraýyna yqpal etedi. Eldiń adamı kapıtaly dál osy ustazdardyń eńbegi arqyly qalyptasady, — dedi Juldyz Súleımenova elordada Táýelsizdik saraıynda.
Onyń sózinshe, memleket pedagog mártebesin arttyrý baǵytynda júıeli jumys júrgizip keledi. Sonyń aıasynda muǵalimderdiń jalaqysy kóterildi, quqyqtyq qorǵalýy kúsheıtildi, ózderine tán emes júkteme azaıtyldy jáne biliktilikti arttyrý múmkindikteri keńeıtildi.
— Qazir Qazaqstan muǵalim mamandyǵynyń qoǵamdyq bedeli boıynsha álemde ekinshi orynda tur. Sonymen qatar pedagogterdiń eńbekaqysyna qanaǵattaný deńgeıi eń joǵary bes eldiń qataryna enedi. Zertteý derekterine sáıkes, muǵalimderdiń 95% óz jumysyna qanaǵattanady, al shamamen 80% tańdaý múmkindigi bolsa, qaıtadan ustazdyq joldy tańdaıtynyn aıtqan, — dedi mınıstr.
Juldyz Súleımenova bilim berý salasy áıelder úshin kásibı turǵydan ózin-ózi júzege asyrýdyń, turaqty jumyspen qamtylýdyń jáne áleýmettik qorǵalýdyń mańyzdy baǵyttarynyń biri bolyp qala beretinin atap ótti.
Buǵan deıin Premer-mınıstr orynbasary — Mádenıet jáne aqparat mınıstri Aıda Balaeva Qazaqstandaǵy bıznes sýbektileriniń jartysyna jýyǵyn áıelder basqaratynyn aıtqan edi.
