Qazaqstan múddesin eskere otyryp, Qytaımen qarym-qatynasty nyǵaıtý kerek – Máýlen Áshimbaev
«Jalpy alǵanda, Qytaı qazir álemdegi ekinshi ekonomıka sanalady. Búgingi bizdiń ekonomıka men Qytaı ekonomıkasynyń aýqymyn salystyrý óte qıyn. Qytaı óte qarqyndy damyp kele jatqan ekonomıkalyq áleýeti zor memleket. Ekonomıka salasynda birlesken jobalar barshylyq, ıaǵnı kólik ári kommýnıkatsııa salasynda jobalarymyz eskerilgen. Biz jańa kólik baǵytyn, ıaǵnı Transkaspıı baǵdaryn damytý boıynsha belsendi jumys istep jatyrmyz», - dedi M. Áshimbaev Senattyń jalpy otyrysynan keıin tilshiler suraǵyna jaýap bere otyryp.
Osy oraıda ol Qytaımen ózara tıimdi qarym-qatynasty saqtap, ony odan ári nyǵaıtý saıasatyn júzege asyrý mańyzdy ekenin aıtty.
«Árıne, birinshi kezekte bizdiń ulttyq múddemizdi eskerý kerek. Elderdiń múddesin eskere otyryp, elderimizdiń egemendigi men táýelsizdigin qurmetteı otyryp, biz Qytaımen osyndaı keshendi qarym-qatynasty damytamyz. Eki el arasyndaǵy shekarady turaqtylyq bolǵanyn qalaımyz. Sondyqtan Memleket basshysynyń sapary barysynda barlyq másele talqylanady. Qazaqstan Prezıdentiniń bul sapary eki el arasyndaǵy ózara tıimdi qarym-qatynasty odan ári nyǵaıtýǵa septigin tıgizeri sózsiz», - dedi Senat tóraǵasy.
Budan buryn habarlanǵandaı, 17 mamyr kúni Prezıdent Qasym-Jomart Toqaev Qytaı Halyq Respýblıkasyna memlekettik saparmen bardy.
