Qazaqstan Moody’s shkalasynda el tarıhyndaǵy eń joǵary reıtıngke ıe boldy

ASTANA. KAZINFORM — Moody’s halyqaralyq reıtıng agenttigi Qazaqstannyń uzaqmerzimdi reıtıngin Baa2-den Baa1-ge deıin kóterdi, boljam — «turaqty». Berilgen reıtıng — el táýelsizdigi jyldaryndaǵy eń joǵary kórsetkish.

Qazaqstannyń kredıt reıtınginiń joǵarylaýy ekonomıkany ártaraptandyrýdyń turaqty qarqynymen birge ınstıtýtsıonaldyq jáne saıası ortanyń úzdiksiz jaqsarýymen baılanysty.

Bul faktorlar ekonomıkalyq turaqtylyqty nyǵaıtýǵa jáne kredıttik turaqtylyqty joǵary reıtıngi bar elder deńgeıine deıin jaqsartýǵa yqpal etedi.

Agenttik memlekettik basqarý jáne sybaılas jemqorlyqqa qarsy kúres salasyndaǵy progresti atap ótti.

Sarapshylardyń pikirinshe, júrgizilip jatqan reformalar saıası turaqtylyqqa, azamattyq belsendilikke jáne qabyldanyp jatqan sybaılas jemqorlyqqa qarsy sharalardyń ashyqtyǵyna oń áserin tıigizedi.

Moody’s qaryzdyń tómen deńgeıimen jáne ony tóleýdiń joǵary múmkindigimen sıpattalatyn Qazaqstannyń senimdi qarjylyq kórsetkishterine, sondaı-aq bıýdjet tapshylyǵyn JІÓ-niń 2,5-3% deńgeıinde ustap turý boıynsha úkimettiń sarabdal saıasatyna nazar aýdardy.

Jańa reformalar, sonyń ishinde jańa Bıýdjet jáne Salyq kodeksterin engizý bıýdjet saıasatynyń tıimdiligin, qarjylyq eseptilikti ári salyq túsimderin arttyrýy tıis.

Esepte sarapshylar Qazaqstan ekonomıkasynyń qurylymyndaǵy munaıǵa qatysty emes sektor úlesiniń ulǵaıýyn atap ótti, ol eldiń kómirsýtekterge táýeldiligin azaıtady jáne munaı baǵasymen qatar óndirý deńgeıiniń aýytqýymen baılanysty táýekelderdi azaıtady.

Moody’s sarapshylary iskerlik klımatty jaqsartý men ınvestıtsııalardy tartý, qolaıly bıznes ekojúıesin qurý men bıýrokratııalyq kedergilerdi azaıtý boıynsha qabyldanǵan sharalar negizinde júrgizilip jatqan jumystardy oń baǵalady. Ulttyq ınfraqurylymdyq ınvestıtsııalyq platformany iske qosý ákimshilik protsesterdi jedeldetýge kómektesedi.

Moody’s sarapshylary basqa kómirsýtekterdi óndirýshi eldermen salystyrǵanda Qazaqstan ekonomıkasynyń anaǵurlym kúshti perspektıvalaryn atap ótti. Agenttiktiń pikirinshe, júrgizilip jatqan reformalar eldiń básekege qabilettiligin nyǵaıtýǵa yqpal etedi.

Sonymen qatar, Moody’s sarapshylarynyń pikirinshe, kólik-logıstıkalyq sektordy damytý Transkaspıı halyqaralyq saýda baǵyty (Orta dáliz) boıynsha júk tranzıti salasyndaǵy belsendiliktiń jyldam ósýine baılanysty ósý men ártaraptandyrýdyń negizgi faktorlarynyń biri bolyp qala beredi.

Orta dálizdiń bolashaǵy sheteldik ınvestorlardy el ekonomıkasynyń ártúrli munaıǵa qatysty emes sektorlarǵa, sonyń ishinde avtomobıl jasaý, farmatsevtıka, tamaq ónerkásibi jáne qurylys materıaldary salalaryna sheteldik ınvestorlardy tartýǵa múmkindik beredi.

Qazaqstannyń kredıttik reıtıngin arttyrý ekonomıkalyq jáne qarjylyq turaqtylyqty nyǵaıtýǵa, eldiń halyqaralyq arenadaǵy bedelin jaqsartýǵa yqpal etedi.

Sondaı-aq kapıtal naryqtarynan ınvestıtsııa tartý sharttaryna ári ekonomıkaǵa tikeleı sheteldik ınvestıtsııalar kólemin ulǵaıtýǵa oń áser etedi.