Qazaqstan Monreal hattamasyna 6 mln. dollar bóletin bolady
ASTANA. QazAqparat -Búgin Parlament Májilisi «1999 jylǵy 3 jeltoqsanda Beıjińde qabyldanǵan Ozon qabatyn buzatyn zattar jónindegi Monreal hattamasyna Túzetýdi ratıfıkatsııalaý týraly» zań jobasyn maquldady.
Ozon qabatyn buzatyn zattarǵa qatysty Monreal hattamasy 1987 jyly qabyldanǵan bolatyn. Al Qazaqstan Monreal hattamasyna 1997 jyly qosyldy. Hattama aıasyndaǵy Beıjiń túzetýi 1999 jylǵy 3 jeltoqsanda qabyldandy. Onda Monreal hattamasynyń múshesi bolyp tabylmaıtyn kez kelgen memleketke gıdrohlorftorkómirtekti eksporttaýǵa nemese ımporttaýǵa tyıym salý belgilenedi jáne Hattamaǵa múshe memleketter gıdrohlorftorkómirtegi óndirisin retteýdiń qosymsha sharalary engiziledi. Qujatty ratıfıkatsııalaý kezinde Qazaqstanǵa Ǵalamdyq ekologııalyq qor tarapynan qarjylyq jáne tehnıkalyq qoldaý kórsetiletin bolady. Al Monreal hattamasyn saqtaýdy qamtamasyz etý úshin Qazaqstanǵa 2015-2017 jyldar aralyǵynda 6 mln. dollardan astam qarjy bólý josparlanǵan.
