Qazaqstan Mońǵolııamen yntymaqtastyqty barynsha nyǵaıtýǵa mán beredi - Toqaev
ASTANA. KAZINFORM – Qazaqstan Mońǵolııamen yntymaqtastyqty barynsha nyǵaıtýǵa mán beredi. Bul týraly Aqordada elimizge memlekettik saparmen kelgen Mońǵolııa Prezıdenti Ýhnaagıın Hýrelsúhpen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.
- Biz Eýrazııadaǵy ejelgi kóshpendiler órkenıetiniń muragerlerimiz. Qazaq pen mońǵol tarıhy ortaq, dostyǵy jarasqan, tamyry bir, salt-dástúri uqsas halyqtar. Qazaqstan Mońǵolııamen yntymaqtastyqty barynsha nyǵaıtýǵa mán beredi. Búgingi sapardyń mán-maǵynasy zor. Eki eldiń qarym-qatynasyn bekemdeı túsýge jol ashady dep senemiz. Buǵan qajetti saıası erik-jigerimiz jáne nıetimiz bar. Saýda-ekonomıkalyq áleýetimiz de jetkilikti. Qazir kópqyrly baılanysymyz dostyq pen ózara qoldaý rýhynda jaqsy damyp kele jatyr. Qarym-qatynasymyzdyń oń sıpatyna joǵary deńgeıdegi belsendi saıası dıalog, eki el Úkimetteri men Parlamentteri arasyndaǵy is-qımyl tikeleı áser etýde, - dedi Prezıdent.
Memleket basshysy 2024 jylǵy qazanda Mońǵolııaǵa jasaǵan memlekettik saparyn erekshe sezimmen eske alatynyn atap ótti.
- Sapar aıasynda kóptegen ýaǵdalastyqqa qol jetkizip, mańyzdy qujattarǵa qol qoıdyq. Sonyń nátıjesinde ekijaqty qarym-qatynasymyz strategııalyq seriktestik deńgeıine kóterildi. Saýda-ekonomıkalyq, mádenı-gýmanıtarlyq yntymaqtastyǵymyz nyǵaıa túsýde. Birqatar jetistik bar. Taýar aınalmy jyldan-jylǵa artyp kele jatyr. Ónerkásip salasyna qatysty naqty jobalardy iske qosýdy josparlap otyrmyz, - dedi Qasym-Jomart Toqaev.
Buǵan deıin Qasym-Jomart Toqaev Aqordada Mońǵolııa Prezıdentin qarsy alǵanyn jazǵan edik.
