Qazaqstan Mońǵolııaǵa jerserik eksporttaıdy
ASTANA. KAZINFORM – Qazaqstan Prezıdentiniń Mońǵolııaǵa memlekettik sapary aıasynda Jerdi qashyqtyqtan zondtaý júıesin qurý jáne damytýǵa baǵyttalǵan tarıhı ınvestıtsııalyq kelisimge qol qoıyldy.
Tsıfrlyq damý, ınnovatsııalar jáne aeroǵarysh ónerkásibi mınıstrliginiń málimetinshe, bul joba Mońǵolııa úshin jerserik qurýdy kózdeıdi. Ol jalpy qazaqstandyq-mońǵoldyq jerserik toptamasynyń quramyna kiredi. Ár taraptyń jerserikterdi derbes basqarýy Qazaqstan men Mońǵolııaǵa tabıǵı resýrstardy monıtorıngileý jáne aýyl sharýashylyǵyn damytý úshin qajetti derekterge qol jetkizýdi qamtamasyz etedi.
«Aıryqsha atap ótetin jaıt — bul Qazaqstan tarıhyndaǵy qazaqstandyq ınjenerler tolyq ázirlegen alǵashqy eksporttyq jerserik bolmaq. Jerserik Mońǵolııanyń qajettilikterine beıimdelip, óńirlik spýtnıktik ınfraqurylymdy nyǵaıtady jáne Qazaqstannyń ǵarysh tehnologııalary salasyndaǵy áleýetiniń artyp kele jatqanyn kórsetedi», — dedi Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev.
Qashyqtyqtan zondtaý tehnologııalary eki elge de jerdiń jaǵdaıyn tıimdirek baqylaýǵa, sý resýrstaryn basqarýǵa jáne qorshaǵan ortadaǵy ózgeristerdi taldaýǵa múmkindik beredi. Qazaqstan men Mońǵolııa ózderiniń tehnıkalyq quzyretterin biriktire otyryp, ekonomıkanyń ózekti máselelerin sheshýge jáne turaqty damýdy qoldaýǵa baǵyttalǵan quraldar ázirleıdi.
Joba Qazaqstannyń Ulttyq ǵarysh ortalyǵy bazasynda mońǵol ınjenerleriniń qatysýymen júzege asyrylady. Qazaqstan mamandary joba barysynda mońǵol áriptesterin oqytý mindetin óz moınyna alyp, qajetti bilimniń berilýi men kásibı baılanysty nyǵaıtýǵa úles qosady. Mundaı ózara árekettestik mońǵol ınjenerleriniń biliktiligin arttyryp, eki el arasyndaǵy ǵylymı jáne tehnıkalyq yntymaqtastyqty tereńdetedi.
Bul joba Qazaqstan men Mońǵolııanyń ozyq tehnologııalardy damytýǵa degen umtylysyn bildirip, ǵarysh salasy men tabıǵı resýrstardy turaqty paıdalanýda seriktestikke jańa perspektıvalar ashady.
Buǵan deıin Jaslan Mádıev Ulanbatyrda Mońǵolııanyń Tsıfrlyq damý, ınnovatsııalar jáne kommýnıkatsııalar mınıstri Tsendıın Baatarhýý myrzamen kezdeskenin jazǵan edik.
Kezdesýde taraptar yntymaqtastyqtyń negizgi baǵyttaryn, sonyń ishinde ınnovatsııalyq ekojúıeni damytý, startaptarǵa qoldaý kórsetý, tsıfrlyq úkimetti (GovTech) damytý jáne aeroǵarysh salasyndaǵy keleshek múmkindikterdi talqylady.
