Qazaqstan Mońǵolııaǵa vagon eksporttaıdy

ASTANA. KAZINFORM — Mońǵolııaǵa Atyraý vagon qurastyrý zaýytynyń ónimderi satylmaq. Bul jóninde Qazaqstannyń Syrtqy saýda palatasynyń basqarma tóraǵasy Murat Qarymsaqov Qazaqstan-Mońǵolııa bıznes forýmynda málimdedi. 

— Búgingi bıznes forýmda Atyraý vagon qurastyrý zaýytynyń ónimderin satyp alý boıynsha kelisimshartqa qol qoıylady. Menińshe, Mońǵolııa shamamen 6,7 mln dollar qarjyǵa vagon alady. Degenmen, bul — basy. Birte-birte saýda kólemi ulǵaıady, — dedi ol jýrnalısterge suhbat bere otyryp.

Sonymen birge, Murat Qarymsaqov elimiz Mońǵolııaǵa eksporttaıtyn basqa da taýarlardy atap ótti.

— Bizden bul el elektronıka, azyq-túlik, metallýrgııa, qurylys zattaryn, astyq ónimderin satyp alady. Al Qazaqstan Mońǵolııadan teri ónimderi, kókónister t. b. taýarlar ımporttaıdy, — dedi ol.

Aıta keteıik, buǵan deıin Toqaev pen Hýrelsúh Qazaqstan men Mońǵolııany jalǵaıtyn avtojol salýǵa keliskenin jazǵanbyz.