Qazaqstan Mońǵolııaǵa taýarlardy kedendik bajsyz eksporttaıdy

ASTANA. KAZINFORM — Búgin Májilistiń jalpy otyrysynda Eýrazııalyq ekonomıkalyq odaq pen Mońǵolııa arasyndaǵy ýaqytsha saýda kelisimi ratıfıkatsııalandy. 

— Sizderdiń qaraýlaryńyzǵa «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Mońǵolııa arasyndaǵy ýaqytsha saýda kelisimin ratıfıkatsııalaý týraly» zań jobasy usynyldy. Kelisim EEAO elderi men Mońǵolııa arasynda 367 taýarlarǵa qatysty ımporttyq kedendik bajdardy joıýdy kózdeıdi. Kelisim 3 jylǵa jasalady jáne taǵy 3 jylǵa avtomatty túrde uzartylady, — dedi Saýda jáne ıntegratsııa mınıstriniń mindetin atqarýshy Janel Kýshýkova.

Onyń aıtýynsha, qujat tehnıkalyq, sonymen qatar sanıtarlyq, fıtosanıtarlyq sharalar, kedendik yntymaqtastyq, ishki naryqty qorǵaý sharalary sııaqty basqa da saýda máselelerin qamtıdy.

— Bul kelisim Mońǵolııa naryǵyna taýarlardy shyǵarý úshin qolaıly jaǵdaılar jasaıdy. Kelisimdi ratıfıkatsııalaý teris áleýmettik-ekonomıkalyq jáne quqyqtyq saldarǵa ákep soqpaıdy. Sondaı-aq respýblıkalyq bıýdjetten qosymsha qarjy shyǵyndaryn qajet etpeıdi, — dedi ol.

Aıta keteıik, búgin Májilistiń jalpy otyrysynda depýtattar Jańa Konstıtýtsııa jobasyn talqylaıdy.