Qazaqstan Mońǵolııa naryǵyna 6 myńnan astam Jet elektr skýterin jalǵa bergen — Jaslan Mádıev
ULAN-BATYR. KAZINFORM – Tsıfrlyq damý mınıstri Jaslan Mádıev Qazaqstan-Mońǵol Іskerlik keńesiniń birinshi otyrysyn ashty. Ulan-Batyrda QR Prezıdenti Qasym-Jomart Toqaevtyń Mońǵolııaǵa memlekettik sapary aıasynda Qazaqstan-Mońǵol Іskerlik keńesiniń birinshi otyrysy ótti. Іs-shara birlesken jumystyń basym baǵyttaryn talqylaý úshin eki eldiń bıznesi men memlekettik qurylymdarynyń negizgi ókilderin jınady. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstrligi málim etti.
Tsıfrlyq damý mınıstri Jaslan Mádıev óziniń sózinde ınnovatsııalyq ekojúıeni qurýdy, startap-jobalardy damytýdy, tsıfrlyq úkimetti (govtech) engizýdi jáne aeroǵarysh salasyndaǵy jobalardy qosa alǵanda, tsıfrlandyrý salasyndaǵy ózara is-qımyldyń negizgi vektorlaryn atap ótti.
Qazaqstan Astana Hub halyqaralyq tehnoparkin damytý boıynsha óz tájirıbesin usyndy, ol jumys istegen jyldary 1500-den astam rezıdentti, onyń ishinde 436 sheteldik kompanııany tartty. Sondaı-aq, jahandyq naryqtarda Ortalyq Eýrazııadan startaptardy qoldaýǵa baǵyttalǵan shet elderde IT-habtar qurýdyń tabysty tájirıbesi usynyldy.
«Mońǵolııa naryǵyna 6 myńnan astam Skýter usynǵan qazaqstandyq Jet elektr skýterlerin jalǵa berý startapy sátti shyqqanyn atap ótýge bolady. Al mońǵol startaptary Astana Hub akseleratsııalyq baǵdarlamalaryna belsendi qatysady. Mysaly, Fibo Group startapy bizdiń tehnoparkte Google for Startups akseleratsııalyq baǵdarlamasynan sátti ótti. Baǵdarlamaǵa qatysý startaptarǵa halyqaralyq tájirıbege jáne jetekshi sarapshylardyń qoldaýyna qol jetkizýge múmkindik beredi, bul olardyń odan ári damýy men jahandyq naryqtarǵa shyǵýy úshin mańyzdy qadam bolyp tabylady», — delingen habarlamada.
Yntymaqtastyqtyń mańyzdy elementi eGov qazaqstandyq elektrondyq úkimet júıesiniń eksportyn talqylaý boldy. Bul joba Mońǵolııaǵa Qazaqstannyń Memlekettik qyzmetterdi tsıfrlandyrýdaǵy jetistikterin paıdalanýǵa múmkindik beredi, onda qyzmetterdiń 90%-dan astamy onlaın rejıminde usynylady.
Іskerlik keńestiń birinshi otyrysy turaqty damýǵa jáne qazirgi zamanǵy syn-qaterlerdi birlesip eńserýge baǵyttalǵan strategııalyq áriptestiktiń berik negizin qalady.
