Qazaqstan mońǵol týrısteri men seriktesteri úshin ashyq – Erbol Myrzabosynov
ASTANA. KAZINFORM – Týrızm jáne sport mınıstri Erbol Myrzabosynov elordada Mońǵolııanyń Mádenıet, sport, týrızm jáne jastar mınıstri Aldarjavhlan Jýkovpen kezdesti.
Taraptar týrızm jáne sport salalaryndaǵy ekijaqty yntymaqtastyqtyń qazirgi jaı-kúıi men odan ári damytý perspektıvasyn talqylady.
Mınıstr Qazaqstan men Mońǵolııa arasyndaǵy seriktestiktiń áleýeti joǵary ekenin atap ótip, ulttyq sport túrlerin damytý jáne halyqaralyq deńgeıde ilgeriletý baǵytyndaǵy ózara is-qımyldyń mańyzyna toqtaldy.
— Mońǵolııa ulttyq sport túrlerimen tanymal. Dástúrli kúres, at jarysy jáne sadaq atý Naadam festıvaliniń ajyramas bóligi. Mońǵol sportshylary halyqaralyq arenada, ásirese kúres, dzıýdo jáne boksta joǵary nátıjeler kórsetip keledi. Ulttyq at sportyn damytý jáne nasıhattaý maqsatynda Mońǵolııa aýmaǵynda halyqaralyq jarystar uıymdastyrýdy usynamyz, — dedi Erbol Myrzabosynov.
Kezdesý barysynda bilim berý salasyndaǵy yntymaqtastyq ta sóz boldy. Astanada ashylatyn Ulttyq sport ýnıversıtetiniń áleýeti tanystyrylyp, shetel azamattaryn jańa ýnıversıtetke qabyldaý bastalǵany aıtyldy. Ýnıversıtet sport ǵylymy, medıtsına jáne tsıfrlyq tehnologııalardy biriktiretin zamanaýı ǵylymı-bilim berý ortalyǵy bolady.
Sonymen qatar týrızm salasyndaǵy áriptestik máseleleri talqylandy. Mınıstr eki el arasyndaǵy týrıstik aǵynnyń turaqty ósip kele jatqanyn atap ótti. 2023-2025 jyldary Mońǵolııadan Qazaqstanǵa kelýshiler sany jyl saıyn 40 myńnan asyp, Qazaqstan azamattarynyń Mońǵolııaǵa sapary da artqan.
Mońǵolııa Prezıdenti Ýhnaagıın Hýrelsýhtyń memlekettik sapary aıasynda 2026-2027 jyldarǵa arnalǵan eki el arasyndaǵy mádenı-gýmanıtarlyq yntymaqtastyq josparyna qol qoıylǵany da atap ótildi.
— Mońǵolııanyń týrızm salasyndaǵy áleýetin erekshe atap ótkim keledi. Týrıstik ónimderdi ózara ilgeriletý, birlesken jobalardy iske asyrý jáne kadr daıarlaý — ortaq mindet. Qazaqstan mońǵol týrısteri men seriktesteri úshin ashyq. Týrızm ındýstrııasy, meımandostyq, sport úshin kadrlar daıarlaý salasynda Halyqaralyq týrızm jáne meımandostyq ýnıversıteti bazasynda yntymaqtastyq ornatýdy usynamyz, — dedi Erbol Myrzabosynov.
Kezdesý qorytyndysynda taraptar týrızm jáne sport salasyndaǵy yntymaqtastyqty nyǵaıtýǵa, birlesken jobalardy iske asyrýǵa jáne tájirıbe almasýdy keńeıtýge daıyn ekenderin rastady.
Aıta ketelik Qazaqstan jáne Mońǵolııanyń memlekettik organdary men bıznes ókilderi 19 kelisimshartqa qol qoıǵan edi.
