Qazaqstan Moldovamen saýda kólemin arttyrýdyń jańa múmkindikterin qarastyrdy
ASTANA. KAZINFORM — Qazaqstan Premer-mınıstri Oljas Bektenov Antalııada Moldova Úkimetiniń basshysy Vasıle Tofanmen kezdesip, saýda, ınvestıtsııa, kólik-logıstıka jáne energetıka salalaryndaǵy yntymaqtastyqty damytý máselelerin talqylady. Bul týraly Úkimet málim etti.
Antalııada (Túrkııa) BUU-nyń klımattyń ózgerýi týraly negizdemelik konventsııasyna qosylýshy taraptardyń 31-shi konferentsııasynyń Sammıti aıasynda Qazaqstan Respýblıkasynyń Premer-mınıstri Oljas Bektenov pen Moldova Respýblıkasynyń Premer-mınıstri Vasıle Tofannyń kezdesýi ótti.
Onda saýda-ekonomıkalyq jáne ınvestıtsııalyq yntymaqtastyq, kólik-logıstıkalyq baılanystardy damytý, sondaı-aq energetıka salasyndaǵy ózara is-qımyl máseleleri talqylandy.
Oljas Bektenov Moldova Qazaqstannyń senimdi seriktesi ekenin atap ótti. Ózara saýdany ulǵaıtý úshin perspektıvalyq baǵyttar belgilendi. Qazaqstannyń eksportyn ulǵaıtý jáne eki el arasyndaǵy kólik qatynastaryn damytý múmkindikterine, onyń ishinde Transkaspıı halyqaralyq kólik baǵyty men Moldovanyń logıstıkalyq ınfraqurylymyn paıdalaný máselelerine nazar aýdaryldy.
Óz kezeginde Vasıle Tofan Qazaqstanda ekonomıkanyń progressıvti ósýin qamtamasyz etý boıynsha júzege asyrylyp jatqan reformalar týraly oń pikir bildirip, eldiń halyqaralyq energetıkalyq naryqtaǵy ustanymdarynyń nyǵaıǵanyn atap ótti. Moldovanyń Qazaqstanmen iskerlik baılanystardy jandandyrýǵa múddeli ekendigi bildirildi.
Taraptar qazaq-moldovan qatynastaryn ekonomıkanyń basym baǵyttary boıynsha odan ári nyǵaıtýǵa nıetti ekenderin rastady.
Eske sala keteıik, Premer-mınıstr Oljas Bektenov COP31 sammıtinde Qazaqstannyń «Taza Qazaqstan» bastamasy, 2 mlrd aǵash otyrǵyzý jospary, sý qaýipsizdigi jáne jasyl energetıkany damytý baǵytyndaǵy basymdyqtaryn tanystyrdy.
