Qazaqstan moldovalyq bıznesmenge qarsy sotty jalǵastyrýda
ASTANA. QazAqparat - Qazaqstan moldovalyq bıznesmen Anatolıı Statı jáne onyń uly Gabrıel Statıge, sondaı-aq Ascom Group S.A. jáne Terra Raf Trans Traiding Ltd kompanııalaryna qatysty sot talqylaýyn jalǵastyrady, dep habarlaıdy «QazAqparat» HAA QR Ádilet mınıstrligine silteme jasap.
Qazaqstan Respýblıkasy sońǵy tórt jyl boıy Moldova azamaty Anatolıı Statı men onyń ulyna, sondaı-aq olardyń kompanııalaryna qatysty sheteldik sot talqylaýlaryna tartylyp keledi. Statı 4 mıllıard AQSh dollarynan astam somany talap etip sotqa shaǵym túsirgen.
Shvetsııanyń Stokgolm qalasynda 2013 jylǵy 19 jeltoqsanda daýdy qaraǵan Arbıtrajdyq tórelik Statılerdiń paıdasyna 500 mıllıon AQSh dollary shamasyndaǵy somany óndirý sheshimin shyǵardy. Qazaqstan kóp kidirmeı bul sheshimniń ústinen shaǵym túsirip, 2014 jylǵy 19 naýryzdaǵy Stokgolmdegi «Svea» Apellıatsııalyq sotynda onyń kúshin joıýdy talap etti.
Sot protsesinde Qazaqstan AQSh sot organdaryna, Latvııa quqyq qorǵaý organdaryna júginip, Statılerdiń Qazaqstanda kóp jyldar boıy alaıaqtyq shemalarǵa qatysqanyn dáleldeıtin materıaldardy aldy.
Shved apellıatsııalyq protsesinde Statılerdiń alaıaqtyq faktileri týraly dálelder qaralmastan, «Svea» 2016 jylǵy 9 jeltoqsanda arbıtrajdyq sheshimdi kúshinde qaldyrdy.
Qazaqstan tarapy Shvetsııanyń Joǵarǵy sotyna apellıatsııalyq sot sheshiminiń ústinen shaǵym túsirdi. Apellıatsııalyq protsess júrip jatqan tusta aryz berýshiler arbıtrajdyq sheshimniń moıyndalýy jáne oryndalýyna qol jetkizý maqsatynda Kolýmbııa Okrýgi sotyna (Vashıngton) ótinish tapsyrady. Qazaqstan Statılerdiń bul áreketterine narazylyq bildirgen soń AQSh Soty sot protsesin toqtatyp, Statıdiń ótinishin qabyldamady.
Statıler, sondaı-aq arbıtrajdyq sheshimdi moıyndaý jáne oryndaý boıynsha Anglııa Joǵarǵy sotyndaǵy sot protsesine bastamashyl boldy. Odan keıin Qazaqstan májbúrli oryndaý boıynsha anyqtalǵan aıǵaqtardy aǵylshyn protsesine usynǵannan soń, sot Qazaqstan Respýblıkasynyń pozıtsııasyn qoldady.
2017 jylǵy 6 maýsymda Anglııa Joǵarǵy soty Qazaqstan Statılerdiń arbıtrajdyq sheshimge alaıaqtyq jolmen qol jetkizgenin kórsetetin jetkilikti dálelderdi keltirdi degen qorytyndyǵa kelip, sot protsesin belgiledi. Bul protsess áli kúnge jalǵasýda. Osydan keıin AQSh pen Anglııada arbıtrajdyq sheshimdi moıyndaý boıynsha qıyndyqtarǵa dýshar bolǵan Statıler aǵylshyn sotynyń sheshimi týraly aqparatty málimdeýsiz, aldyn ala qamtamasyz etý sharalary úshin AQSh (Nıý-Iork), Shvetsııa, Nıderlandy, Lıýksembýrg sot organdaryna júginedi. Bul protsester eki ne odan da kóp jylǵa sozylýy múmkin. Sonymen qatar Shvetsııa jáne Nıderlandy sot atqarý organdary qabyldaǵan qamtamasyz etý sharalary aldyn ala sıpatqa ıe.
Aǵymdaǵy jyldyń 5 qazan kúni Qazaqstan Respýblıkasy AQSh-tyń uıymdasqan qylmys jáne sybaılas jemqorlyqqa qarsy kúres týraly zańyna sáıkes, Kolýmbııa okrýginiń Vashıngtok Okrýgtik sotyna Statılerge qarsy azamattyq qýynym berdi.
