Qazaqstan mys ónerkásibin tereń óńdeýge bet burdy
ASTANA. KAZINFORM — Premer-mınıstrdiń orynbasary – ulttyq ekonomıka mınıstri Serik Jumanǵarın GP Günter Papenburg AG nemis ónerkásiptik holdınginiń basshysy Karl Gıýnter Papenbýrgpen kezdesti. Taraptar Qazaqstannyń mys ónerkásibin damytý jospary men yqtımal yntymaqtastyq baǵytyn talqylady. Bul týraly Úkimet málim etti.
Kezdesý elimizde júzege asyrylyp jatqan belsendi ekonomıkalyq ósý saıasatynyń jalǵasy. Onyń sheńberinde Úkimet óńdeý ónerkásibiniń basym salalaryn damytýǵa qatysýdy usyna otyryp, elimizge jetekshi halyqaralyq kompanııalar men ınvestorlardy maqsatty túrde tartady. Kelissózder barysynda qazaqstandyq tarap mys salasyn damytý boıynsha óz kózqarastaryn bildirip, naqty yntymaqtastyq formatyn qaraýdy usyndy.
— Mys ónerkásibin damytý jáne tehnologııalyq jańartý — Qazaqstannyń jańa belsendi ekonomıkalyq saıasatynyń negizgi baǵytynyń biri. Ósýdiń jańa modeli sheńberinde ishki jáne syrtqy naryqta suranysqa ıe neǵurlym tereń qaıta bólý ónimderin shyǵarýǵa basa nazar aýdarylatyn basym salalar aıqyndaldy, — delingen habarlamada.
Qazaqstanda 130-ǵa jýyq mys ken orny bar. Jyl saıyn shamamen 170 mln tonna ken óndiriledi. Bul — álemdik kólemniń shamamen 4%-y. Bul rette ónimniń 97%-y katod, kontsentrat jáne ken túrinde eksporttalady. Óndiriletin kenniń negizgi bóligi jylyna shamamen 750-800 myń tonna mys-kontsentratqa (ekinshi qaıta bólý) deıin baıytylady. Osy kólemniń shamamen 470 myń tonnasy katod óndirisine ketedi (úshinshi qaıta bólý). Kontsentrattyń qalǵan bóligi ári qaraı óńdelmeı eksporttalady. Sym, folga, kabel men basqa da buıym óndirisi sekildi qaıta bólýdiń joǵary ónimi 5%-dan az. Mys salasyndaǵy jalpy qosylǵan qundy molaıtýdyń áleýeti 20 eseden astam baǵalanady. Osy barlyq faktorǵa baılanysty mysty joǵary qaıta óńdeýdi damytý el ishinde qosylǵan qundy arttyrýdyń negizgi baǵyty retinde qarastyrylady.
Nemis tarapy máseleni egjeı-tegjeıli pysyqtaýǵa qyzyǵýshylyq bildirdi. Mys kontsentratyn Qazaqstannan Germanııaǵa jetkizý de qarastyrylýy múmkin. Alaıda, ol logıstıkany qosymsha pysyqtaýdy talap etedi. Budan basqa, kompanııa Qazaqstanda neǵurlym tereńdeı qaıta bólý óndirisin qurý múmkindigin zerdeleýge daıyn. Ol úshin neǵurlym tıimdi óndiristerdi shıkizat kózderine jaqyn ornalastyrǵan jón.
Taraptar «Báıterek» holdınginiń qatysýymen jáne Germanııadaǵy qazaqstandyq elshiliktiń qoldaýymen yqtımal yntymaqtastyq formattaryn pysyqtaýǵa kelisti.
GP Günter Papenburg AG — 160 jyldan astam tarıhy bar Germanııadaǵy eń iri jeke ónerkásip jáne qurylys tobynyń biri. Holdıng shıkizat óndirý, qurylys materıalyn óndirý, ǵımarat salý, avtomobıl jáne temir jol salý, tehnıka saýdasy, logıstıka men qaldyqty kádege jaratý salasynda jumys isteıdi.
Top biryńǵaı óndiristik-logıstıkalyq ekojúıeni qura otyryp, 61 enshiles kompanııany biriktiredi. Halyqaralyq jobalardy júzege asyrý tájirıbesine ıe. Qazaqstanda Papenburg Astana — Býrabaı avtobanynyń qurylysyna qatysqan. Bul onyń iri ınfraqurylymdyq jobalardy júzege asyrýdaǵy quzyretin kórsetedi.
