Qazaqstan Mınamat konventsııasyna qol qoıýy múmkin
NUR-SULTAN.QazAqparat - Elordada Qazaqstannyń Mınamat konventsııasyna qol qoıý múmkindikterin talqylaǵan konferentsııa ótti, dep habarlaıdy QazAqparat tilshisi.
«Qazaqstan Stokgolm, Rotterdam jáne Bazel konventsııalaryna birdeı qol qoıǵan memleket sanalady. Al BUU-nyń Mınamat konventsııasyna qosylý qaýipti qaldyqtardyń qorshaǵan ortaǵa zııandy áserin azaıtýǵa múmkindik beredi», - deıdi QR ekologııa, geologııa jáne tabıǵı resýrstar mınıstrligine qarasty qaldyqtardy basqarý departamentiniń dırektory Nuraı Satımov.
Onyń aıtýynsha, Pavlodar hımııa zaýytynyń aýmaǵyndaǵy Bylqyldaq kólinde, Nura ózeniniń irgeles aýmaqtarynda synaptan lastanǵan ýchaskeler baıqalǵan.
«Biz keńestik óndiriste synaptyń kóp qoldanylǵanyn, odan lastanǵan úlken oshaqtar bar ekenin bilemiz. Solardyń qataryn keıingi jyldary paıda bolǵan oshaqtar tolyqtyryp jatyr. Atap aıtsaq, Qazaqstanda kómir jaǵý kólemi azaımaı tur. Nura ózeninde júrgizilgen qosymsha zertteýler ondaǵy balyq aǵzasynda synap bar ekenin anyqtady. Ol synap balyq arqyly «qorektik tizbek» boıynsha adam aǵzasyna enýi múmkin», - dedi Nuraı Satımov.
Mamannyń aıtýynsha, atalmysh Konventsııa qabyldansa, eldegi barlyq ónerkásip kásiporyndary óndiris shyǵaryndylaryna monıtorıng júrgizip, tıimdi basqarý júıesine kóshedi.
«Mınamat konventsııasynyń mindetti sharalaryn oryndaý úshin biraz shyǵyndalý qajet. Alaıda, atalmysh qujat damýshy elder men ótpeli ekonomıkadaǵy elderge qarjylyq jáne tehnıkalyq qoldaý kórsetýdi kózdeıdi. Jahandyq ekologııalyq qor synaptan lastaný máselelerin sheshýge baǵyttalǵan jobalardy qarjylaı qoldap keledi», - dedi mınıstrlik ókili.
Ázirshe Mınamat konventsııasy elimizde qashan qabyldanatyny belgisiz.
«Áýeli barlyq múddeli taraptar ortaq kelisimge kelýi kerek. Naqty sheshimder qabyldardyń aldynda bıznes-toptardyń, halyqaralyq sarapshylardyń pikiri eskeriledi. Barlyq usynystar men eskertýler nazarǵa alynady», - dedi Nuraı Satımov.
