Qazaqstan Mılan-2026 qysqy Olımpıadasyna taǵy 12 lıtsenzııa jeńip aldy

ASTANA. KAZINFORM – Konkımen júgirýden 14 qarasha men 14 jeltoqsan aralyǵynda AQSh, Kanada, Nıderland jáne Norvegııada ótken Álem kýbogi kezeńderiniń qorytyndysy boıynsha Qazaqstan quramasy 12 lıtsenzııa jeńip aldy. Bul týraly Týrızm jáne sport mınıstrliginiń baspasóz qyzmeti habarlady. 

Lıtsenzııa ıegerleriniń esimi men sportshylar sany ulttyq qurama bas bapkeriniń sheshiminen keıin belgili bolady. Boljam boıynsha, 2026 jylǵy qysqy Olımpıadada konkımen júgirýden el namysyn 5 sportshy qorǵaıdy.

Esterińizge sala keteıik, buǵan deıin mánerlep syrǵanaý sportynan Mıhaıl Shaıdorov pen Sofıa Samodelkına álem chempıonatynda olımpıadalyq normatıvti oryndap, eki joldama jeńip alǵan edi. Sonymen qatar otandyq short-trekshiler el qorjynyna taǵy 9 joldama saldy. Bapkerler shtabynyń sheshimimen Mılanda Denıs Nıkısha, Abzal Ájiǵalıev, Olga Tıhonova jáne ıAna Han baq synaıdy. Osylaısha, qazirgi tańda Qazaqstan quramasynyń qorjynynda sporttyń úsh túrinen 23 lıtsenzııa bar.

Olımpıadaǵa arnalǵan naqty lıtsenzııa sany 2026 jylǵy qańtar aıynyń sońynda belgili bolady.

XXV qysqy Olımpııa oıyndary 2026 jylǵy 6-22 aqpan kúnderi Italııanyń Mılan jáne Kortına-d’Ampetstso qalalarynda ótedi. Oǵan álemniń 93 elinen 3 500-den astam sportshy qatysady.

Lıtsenzııa boıynsha aqparat:

Erler:
500 metr – 1 lıtsenzııa

Áıelder:
500 metr – 2 lıtsenzııa
1000 metr – 2 lıtsenzııa
1500 metr – 2 lıtsenzııa
3000 metr – 2 lıtsenzııa
5000 metr – 1 lıtsenzııa
Mass-start – 1 lıtsenzııa
Komandalyq jarys – 1 lıtsenzııa 

Aıta ketelik frıstaıl-akrobatıkadan Qazaqstannyń erler quramasy Fınlıandııanyń Rýka qalasyndaǵy Eýropa kýbogy kezeńindegi ónerin aıaqtady.