Qazaqstan Mı-8AMT tikushaǵyn qurastyrýdy qaıta qolǵa alady
ASTANA. QazAqparat - Búgin Astanada Qazaqstan Respýblıkasynda Mı-8AMT (Mı-171) tikushaǵyn qurastyrýdyń iri torabyn qurý týraly kelisimshart jasaldy, dep habarlaıdy QazAqparat.
Qazaqstan jáne Reseı prezıdentteriniń arasynda buryn qol jetkizilgen kelisimderge sáıkes, qujatqa QR Qorǵanys jáne aeroǵarysh ónerkásibi mınıstrliginiń «Qazaqstan ınjınırıng» UK» AQ men «Rosteh» Memlekettik korporatsııasynyń «Vertolety Rossıı» AQ qol qoıdy.
Tikushaqtar «№405 Avıa jóndeý zaýyty» AQ óndiris alańdarynda qurastyrylyp, tapsyrys berýshiniń talaptaryna qaraı beıimdeledi. Kásiporyn Mı-8/17/171 tıpindegi tikushaqtardy jóndeý, jańǵyrtý jáne olarǵa tehnıkalyq qyzmet kórsetý úshin qazaqstandyq jáne halyqaralyq organdardyń sertıfıkatyn alǵan.
Búginde memlekettik mekemeler men kommertsııalyq áýe kompanııalary respýblıkadaǵy Mı-8AMT(Mı-171) tikushaqtaryna negizgi tapsyrys berýshiler bolyp otyr.
QR Qorǵanys jáne aeroǵarysh ónerkásibi mınıstrligi baspasóz qyzmetiniń málimdeýinshe, Qazaqstanda alǵash ret aýyr tikushaqtardy qurastyrý tehnologııasy engizilmek, al qurastyrý óndirisi alǵash ret bıýdjettik ınvestıtsııalarsyz uıymdastyryldy. Tikushaq qurastyrý óndirisiniń qolǵa alynýy elimizdiń qorǵanys-ónerkásiptik keshenin, azamattyq tikushaq ındýstrııasyn, oqý-jattyǵý bazalaryn damytýǵa serpin beredi.
Aıta keterligi, Mı-8AMT(Mı-171) tikushaǵyn M.L.Mıl atyndaǵy Máskeý tikushaq zaýyty jasaǵan. Ony jolaýshy tasymalyna da, 4 tonnaǵa deıingi júkterdi tasymaldaýǵa da, izdeý-qutqarý jumystary jáne órt sóndirýge de paıdalanýǵa bolady.
Qazirgi kezde Ortalyq jáne Ońtústik-Shyǵys Azııa, Taıaý Shyǵys, Afrıka, Eýropa, Latyn Amerıkasy, TMD elderinde osy markanyń túrli modıfıkatsııadaǵy 1 myńnan astam tikushaǵy paıdalanylady.
Avtory: Sara Qabıqyzy
