Qazaqstan metan shyǵaryndylaryn azaıtýda nátıjege qol jetkizdi — Zúlfııa Súleımenova
ASTANA. KAZINFORM – Astanada ótken óńirlik ekologııalyq sammıt aıasynda QR Syrtqy ister mınıstrliginiń erekshe tapsyrmalar jónindegi elshisi Zúlfııa Súleımenova elimizdiń ekologııa salasyndaǵy jetistikteri men basym baǵyttary týraly aıtty.
Onyń aıtýynsha, Qazaqstan bul salada edáýir tájirıbe jınaqtap, birqatar baǵytta naqty nátıjege qol jetkizgen.
— Atap aıtqanda, metan shyǵaryndylaryn azaıtý boıynsha Qazaqstan naqty nátıjege qol jetkizgen elderdiń biri. Osy tájirıbeni halyqaralyq deńgeıde bólisýge múmkindik bar, — dedi Zúlfııa Súleımenova.
Ol sammıttiń naqty qorytyndysy aldaǵy kúnderi jarııalanatynyn atap ótti. Sonymen birge, 2023 jyly daıyndyq kezeńinde eki negizgi másele aıqyndalǵanyn eske saldy. Olar — alańnyń óńirlik yntymaqtastyqqa yqpaly jáne ekologııalyq kún tártibin ilgeriletýge qosatyn úlesi.
Spıkerdiń sózinshe, sammıt barysynda halyqty tikeleı alańdatatyn máselelerge basymdyq berilgen. Atap aıtqanda, aýa sapasy, qaldyqtardy basqarý jáne sý resýrstary talqylanǵan. Bul qoǵamdaǵy ekologııalyq jaýapkershilik deńgeıiniń joǵary ekenin kórsetedi.
Sonymen qatar ol jasandy ıntellekt tehnologııalarynyń ekologııaǵa áserine toqtaldy. Ásirese, derekterdi óńdeý ortalyqtarynyń resýrstardy kóp tutynatynyna nazar aýdardy.
— Mundaı ortalyqtar úlken kólemde elektr energııasy men sýdy qajet etedi. Olardyń úzdiksiz jumys isteýi úshin salqyndatý júıeleri qoldanylady. Bul sý tutynýdyń artýyna ákeledi, — dedi ol.
Osyǵan baılanysty qazir derekter ortalyqtarynyń energııa tutynýyn azaıtý, jańartylatyn energııa kózderine kóshý jáne sý resýrstaryn únemdeý sharalary qarastyrylyp jatyr.
Onyń aıtýynsha, aldaǵy ýaqytta bul talaptar kúsheıtilip, memlekettik saıasattyń mańyzdy baǵyttarynyń birine aınalýy múmkin. Halyqaralyq deńgeıde de túrli sheshimder talqylanýda. Sonyń biri — shyǵaryndylary tómen, biraq sý tutynýy joǵary ıadrolyq energetıka.
— Negizgi maqsat – tabıǵı resýrstardy tutynýdy azaıtyp, qorshaǵan ortaǵa túsetin júktemeni tómendetý, — dep túıindedi Zúlfııa Súleımenova.
Aıta keteıik, buǵan deıin Óńirlik ekologııalyq sammıtte metan shyǵaryndylaryn azaıtý máselesi kóterilgenin jazǵanbyz.
