Qazaqstan metallýrgııasy: elimizdegi 274 kásiporynda qandaı ónim shyǵarylady
ASTANA.KAZINFORM - Metallýrgııa ónerkásibi – el ekonomıkasy júıesin quraýshy negizgi salalardyń biri. Ol qara jáne tústi metallýrgııany, ferroqorytpa, asyl, sırek jáne jerde sırek kezdesetin metaldar óndirýdi, sondaı-aq olardy tereń óńdeı otyryp, ónim shyǵarýdy qamtıdy.
Sala qurylys, mashına jasaý, energetıka, kólik jáne qorǵanys-ónerkásip kesheni sııaqty mańyzdy baǵyttardy negizgi materıaldarmen qamtamasyz etip, ekonomıkanyń odan ári damýy men ártaraptandyrylýyna berik negiz qalaıdy.
Elimizdiń óńdeý ónerkásibi óndirisi kóleminiń 40%-dan astamy metallýrgııa salasyna tıesili. 2026 jyldyń І jartyjyldyǵynyń qorytyndysy boıynsha óńdeý ónerkásibindegi óndiris kólemi 9,8%-ǵa ósip, 16,2 trln teńgege jetti. Osylaısha bul kórsetkish taý-ken óndirý salasynyń kóleminen asyp tústi.
Ótken jyly da óńdeý ónerkásibiniń ekonomıkadaǵy úlesi 13% bolsa, taý-ken óndirý salasynyń úlesi 11,9% boldy.
Metallýrgııa sektory shıkizattyq emes eksporttyń eleýli bóligin qamtamasyz etip qana qoımaı, ónerkásibi áleýetti óńirlerdegi jumyspen qamtý isinde mańyzdy ról atqaryp otyr. Búginde Qazaqstanda bolat, ferroqorytpa, mys, alıýmınıı, myrysh jáne basqa da ónim túrlerin shyǵaratyn 274 kásiporyn jumys isteıdi.
Ónerkásip jáne qurylys mınıstrligi málimetinshe, saladaǵy negizgi óndiris oryndary Qaraǵandy, Pavlodar, Shyǵys Qazaqstan, Aqtóbe, Qostanaı, Ulytaý oblystarynda ornalasqan. Tek ótken jyldyń ózinde kásiporyndar 19 trln teńgeniń ónimin óndirdi.
Ónerkásiptik óndiris ındeksi 1,2%-ǵa ósti, onyń ishinde qara metallýrgııa boıynsha ósim 4,3% boldy. Metallýrgııa salasynyń basty kúshi – adamdar. Búginde bul keshen kásiporyndarynda 200 myńnan astam maman eńbek etedi. Osynaý eńbekkererdiń bilimi, tájirıbesi jáne kásibı turǵydaǵy qarym-qabileti saladaǵy jumystyń turaqty júrýin, óndiristiń damýyn jáne ozyq tehnologııalar engizilýin qamtamasyz etip keledi.
Mınıstrlik metallýrgterdi kásibı merekesimen quttyqtap, olar adal da qajyrly eńbegi jáne kásibı joǵary deńgeıi arqyly Qazaqstannyń ónerkásiptik áleýeti men ekonomıkasynyń damýyna zor úles qosyp otyrǵanyn atap ótti.
Buǵan deıin Qazaqstannyń taý-ken metallýrgııa kesheni qalaı ózgerip jatqanyn jazǵan bolatynbyz.
Qazaqstan metallýrgııaǵa qajetti shıkizatty Aýǵanstan men Qyrǵyzstannan ımporttaıdy.
