Qazaqstan metallýrgııa salasynda úndistandyq kompanııamen seriktestikti kúsheıtpek
ASTANA. KAZINFORM — Ónerkásip jáne qurylys mınıstri Ersaıyn Naǵaspaev Jindal Group kompanııasynyń bas dırektory Hanýman Raomen kezdesti, dep habarlaıdy vedomstvonyń baspasóz qyzmeti.
Áńgimelesý barysynda Qazaqstannyń taý-ken metallýrgııa salasyndaǵy jetekshi halyqaralyq kompanııalarmen strategııalyq áriptestikti damytýǵa úlken mán beretini atap ótildi. Sondaı-aq elimizdiń uzaq merzimdi yntymaqtastyq ornatýǵa qyzyǵýshylyq týdyrtatyn bazalyq metaldardy óndirý jáne qaıta óńdeý salasyndaǵy eleýli áleýeti atap kórsetildi.
Mınıstr sondaı-aq ınvestorlar úshin qolaıly jaǵdaılar jasaý baǵytynda atqarylyp jatqan jumystar týraly habarlady. Osy oraıda ol tsıfrlyq sheshimderdi damytý jáne jer qoınaýyn paıdalaný, barlaý men óndirý quqyqtaryn alý úderisteriniń ashyqtyǵyn qamtamasyz etý sharalaryn atap ótti.
— Otandyq taýar óndirýshilerdi shıkizatpen basym tártippen qamtamasyz etý tetikterine súıene otyryp, metaldardy tereń óńdeý salasyndaǵy jobalardy iske asyrý jáne turaqty shıkizat bazasyn qalyptastyrý múmkindikterine erekshe nazar aýdaryldy. Kezdesý qorytyndysy boıynsha taraptar syndarly dıalogty damytýǵa jáne yntymaqtastyqtyń ózara tıimdi baǵyttaryn pysyqtaýǵa daıyn ekendikterin bildirdi, — delingen habarlamada.
Aıta keteıik, Jindal Group — Úndistandaǵy eń iri ónerkásiptik konglomerattardyń biri, onyń aktıvteriniń jıyntyq quny shamamen 35 mlrd AQSh dollaryn quraıdy. Kompanııa metallýrgııa, energetıka, taý-ken óndirisi, ınfraqurylym, tsement ónerkásibi jáne jańartylatyn energetıka salalarynda jahandyq oıynshy sanalady.
Buǵan deıin «Jibek Joly» telearnasyndaǵy «Ýáde» baǵdarlamasynda ónerkásip jáne qurylys mınıstri Ersaıyn Naǵaspaev atqarylǵan jumystardyń qorytyndysyn tarazylap, salanyń negizgi nátıjeleri men túıtkildi máseleler jóninde oı bólisti.
