Qazaqstan metall kontsentratynyń eksportyna nege tyıym salmaı otyr

ASTANA. KAZINFORM — Ónerkásip jáne qurylys mınıstrligi Ónerkásip komıtetiniń tóraǵasy Azamat Panbaev Úkimet otyrysynan keıin ótken baspasóz máslıhatta Qazaqstan nege metaldy shıkideı satýdan bas tartpaı otyrǵanyn túsindirdi.

— Qazaqstan jyl saıyn 10 mln tonna temir kontsentratyn, 2 mln tonnaǵa jýyq mys kontsentratyn, 200 myń marganets kontsentratyn, 400 myń tonna myrysh kontsentratyn, 300 myń tonna hrom kontsentratyn, 40 myń tonna qorǵasyn kontsentratyn eksporttaıdy. Jalpy kontsentrat pen kendi eksporttaýǵa nege shekteý qoımaı otyrsyzdar, — dep surady jýrnalıst.

Komıteti basshysy temir kontsentratynyń eksporty bolashaqta azaıady degen esep aıtty.

— Siz aıtyp otyrǵandaı 10 mln tonnaǵa jýyq temir kontsentratsııasyn syrtqa shyǵaratynymyz ras. Temirtaýdaǵy Qarmet kásiporny otandyq shıkizatpen jumys isteıdi. Biraq onyń bárin tolyqtaı óńdemeıdi ǵoı. Artyq qalǵanyn eksporttaıdy. Biraq bizde Qostanaı oblysynda Sokolov-Sarybaı ken baıytý kombınaty bar. Sonyń bazasynda ystyqtaı temir óńdeý jobasyn iske asyrý josparlanǵan. Onyń iske asyrý gaz tartý jobasyna baılanysty bolyp otyr. Gaz kirgen kezde iske asyrý múmkin bolady. Jobanyń merzimi 2029 jylǵa dep belgilengen, — dedi ol.

Onyń paıymdaýynsha, metall shıkizatynyń eksportyn toqtatsa, monoqalalarǵa zııany tııýi múmkin.

— Eksportqa tyıym salý úshin ózimizge óńdeý kerek qoı. Jańaǵy aıtqan joba sol óńdeýdi jolǵa qoıýǵa arnalyp otyr. Al syrtqa eksporttalyp jatqan 1,5 mln tonna mys kontsentratyn ózimizde óńdeý úshin qazir Qytaı kompanııasymen birge Abaı oblysynda mys balqytý jobasynyń qujattamasyn ázirlep jatyrmyz. Biz zań aıasynda shıkizat eksportyna lıtsenzııalaý tetigin engizý arqyly, ıaǵnı, lıtsenzııa arqyly baqylaı otyryp shıkizat eksportyn birtindep-birtindep azaıtamyz. Zań kúshine engen. ıAǵnı, ondaı saıasat bar, Úkimet qoldap otyr. Іske asady. Al eksportqa tolyqtaı tyıym salý áleýmettik shıelenisterge ákelýi múmkin. Óıtkeni kóbiniń óndirisi monoqalalarda ornalasqan. ıAǵnı, jumys oryndaryn saqtap qalý máselesi bar, — dedi komıtet basshysy.

Sondaı-aq, Úkimet otyrysynda «QazMunaıGaz» kompanııasy polıetılen óndirisine 11 mlrd teńge ınvestıtsııa tartatynyn aıtyldy. 

Eske salsaq, «Qazaqmysqa» sırek metaldar kontsentratyn zańsyz eksporttap otyr degen aıyp taǵylǵan.