Qazaqstan meshitterinde radıkaldyq baǵyttar nasıhattalmaıdy
ASTANA. QazAqparat - Ideologııalyq turǵyda jastardyń basyn aınaldyrý tetikteri Internet jelisinde qamtylyp otyr. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda QR Din isteri agenttiginiń tóraǵasy Marat Ázilhanov málim etti.
«Meshit ishinde namazǵa kelgen jamaǵattyń birde-bireýi radıkaldandyrý nasıhatyna ushyramaıdy. Óıtkeni, meshitterde Qazaqstan musylmandary dinı basqarmasynyń ımamdary bul jaǵdaıdy qadaǵalap otyrǵanyn biz naqty aıta alamyz. Olar tıisti jumystardy júrgizip jatyr», - dedi agenttik basshysy.
M. Ázilhanovtyń sózine qaraǵanda, ıdeologııalyq turǵyda jastardyń basyn aınaldyrý tetikteri Internet jelisinde qamtylyp otyr. Sondaı-aq , bundaı sharalar meshitten tys beıresmı toptarda júzege asyrylady.
«Meshitke barlyq jamaǵat juma namazyna qatysý úshin keledi. Osy kezde namaz osy meshittiń ımamynyń jetekshiligimen ótedi jáne onda jumalyq ýaǵyzdan basqa áńgime júrgizilmeıdi», - dep túıdi M. Ázilhanov.
