Qazaqstan meniń ekinshi úıimdeı: Silk Way Star jeńimpazy Mıshel Djozef

— Qazaqstandy saǵyndyńyz ba?

— Árıne, qatty saǵyndym. Bul jer maǵan ekinshi úıimdeı bolyp ketti.

— Silk Way Star baıqaýynda jeńiske jetkennen keıin ómirińizde ne ózgerdi?

— Jeńisten keıin kóptegen marapatqa ıe boldym, sonyń ishinde Mońǵolııada memlekettik nagrada aldym. Biraq másele tek marapatta emes. Onyń artynda úlken jaýapkershilik bar. Ata-analarymyzdyń zamanynda mońǵol men qazaq halqy óte jaqyn, baýyrlas bolǵan. Bizdiń býynda osy baılanysty saqtap qalý meniń mindetim dep sanaımyn. Sol úshin qazaq tilinde kóbirek án jazyp, Qazaqstanǵa jıi kelip, mońǵol ánderin de oryndaǵym keledi.

— Ózińizdi tek ártis emes, el ókili retinde sezinesiz be?

— Baıqaý kezinde de, qazir de óz elimdi tanystyryp júrmin. Qaıda barsam da, osy jaýapkershilikti sezinemin. Ártis — óz qoǵamynyń, óz eliniń aınasy.

— Shyǵarmashylyq kózqarasyńyz qalaı ózgerdi?

— Kózqarasym keńeıdi. Ánderimde qozǵaǵym keletin taqyryptar ózgerdi. Buryn naqty josparlarym bolsa, qazir kóbirek oılanyp, kóbirek eńbek etý kerektigin túsindim. Bul qıyn, biraq jaqsy ózgeris.

— Qazaqstanǵa oralǵannan keıin jankúıerlerdiń qoldaýyn sezinesiz be?

— Iá, óte kóp qoldaý sezinemin. Qazaqstandyq tyńdarmandardan kóptegen habarlama alamyn. Sol sebepti qazaq tilinde kóbirek án jazǵym keledi. Qazir ekinshi qazaqsha ánimniń ústinde jumys istep jatyrmyn, jaqynda jaryqqa shyǵady dep úmittenemin.

— Qazaq tilinde án aıtýǵa ne shabyt berdi?

— Qazaqstandaǵy halyqtyń, sondaı-aq Mońǵolııadaǵy qazaqtardyń qoldaýy shabyttandyrdy. Qazaq tilin óte jaqsy kóremin, áýezi erekshe. Qazir tildi úırenip júrmin, tipti onlaın muǵalim taptym.

— Sizdi eki el arasyndaǵy mádenı kópir dep ataıdy. Bul jaýapkershilikti sezinesiz be?

— Bul marapat jaýapkershiliktiń ne ekenin túsinýge kómektesti. Bul tek qýanysh emes, odan da kóp eńbek etýdi talap etedi. Eshkim arnaıy «mádenı kópir bol» dep aıtqan joq, biraq men ony ózim sezinemin.

— Qazaq pen mońǵol mádenıetiniń uqsastyqtary bar ma?

— Iá, uqsastyqtar óte kóp. Kóshpeli ómir salty, dástúrler men qundylyqtar ortaq. Keıde ónerimde qazaq ánderin mońǵol vokaldyq tehnıkasymen úılestiremin, olar óte jaqsy úndesedi.

— Ónerińiz arqyly qandaı oı jetkizgińiz keledi?

— Mońǵolııany túrli mádenıet pen dindi qurmetteıtin, beıbit ómir súretin el retinde kórsetkim keledi. Mońǵol halqy óte meıirimdi, keńpeıil. Sony mýzykam arqyly jetkizýge tyrysamyn.

— Jas ónerpazdarǵa qandaı keńes aıtar edińiz?

— Ózińizge senip, júregińizdiń únine qulaq asyńyz. Qıyn bolsa da, alǵa umtylýdy toqtatpańyz. Óner joly ońaı emes, biraq mýzyka arqyly adamdarǵa áser etip, olarǵa rýhanı qoldaý kórsete alatyndyqtan, onyń ózindik ereksheligi bar. Eger óz bolmysyńyzǵa adal bolyp, bar yqylasyńyzben eńbek etseńiz, óz sátińiz mindetti túrde keledi.

Blıts:

Mýzyka men úshin…

aýadaı qajet.

Etno ma, álde pop pa?

Etno.

Júrek pe, álde aqyl ma?

Júrek.

Baqylaý ma, álde erkindik pe?

Baqylaý.

Úlken sahna ma, álde shaǵyn kontsert pe?

Úlken sahna.

Improvızatsııa ma, álde naqty jospar ma?

Improvızatsııa.

Jeke oryndaý ma, álde dýet pe?

Jeke oryndaý.

Aıta keteıik, Memleket basshysy mońǵol ánshisiniń Silk Way Star konkýrsynda kórermenniń yqylasyna bólengenin aıtqan edi.