Qazaqstan – meniń Jeruıyǵym: Qazaqstandaǵy orys halqy jańa fleshmob bastady
NUR-SULTAN. QazAqparat – Áleýmettik jeli qoldanýshylary jýrnalıst Aleksandra Myskına bastalǵan fleshmobty belsendi qoldap jatyr, dep habarlaıdy QazAqparat.
«Qazaqstandaǵy orys ulty! Aqparattyq soǵysqa Qazaqstannyń kópultty álemin qurtýǵa jol bermeıik. Biz óz Jeruıyǵymyzdy eshqashan satpaımyz! Keı adamdar Qazaqstandaǵy orystardy neden qutqarǵysy keledi? Mol dastarhannan, kishkentaıdan ósirgen ájelerdiń qushaǵynan, uly qazaq halqynyń sheksiz meıirimi men danalyǵynan ba... Biz qazaq tilin úırenýge daıynbyz, úırenip te júrmiz, óıtkeni biz qazaqtarymyzdy shyn júrekpen jáne jan-tánimizben jaqsy kóremiz. Jańa mektepter ashylyp jatqanyna óte qýanyshtymyz jáne qazaq tili biz úshin esh qıyndyq týdyrmaıdy! Eń bastysy, Y. Altynsarın aıtqandaı «Kel, balalar, oqylyq» deımiz. Biz balalardyń Beıbitshilik týraly bilim alǵanyn qalaımyz! Sondyqtan «Qazaqstan – meniń Jeruıyǵym» fleshmobyn bastaımyn», - dep jazdy Aleksandra Myskına Facebook paraqshasynda.
Jeli qoldanýshylary jańa fleshmobty birden qoldady jáne alǵys aıtqandar da bar.
«Elimdi qalaı jaqsy kóretinim týraly post jazǵanym úshin júzdegen adam rahmet aıtty. Ne úshin? Ómir boıy birge jasaǵan adamdar men ólkeni qurmettep, jaqsy kóretinim úshin rahmet aıtýdyń qajeti bar ma? Bul meniń paryzym, árıne, basqasha bolýy múmkin emes... Biraq bul maǵan Qazaqstandaǵy orystardyń qoldaýy qazaqtar úshin qandaı mańyzdy ekenin jáne kerek ekenin taǵy da kórsetti! Jyly lebiz jazǵandardyń barlyǵyna rahmet», - dep jaýap berdi Aleksandra Myskına.
Jas ánshi Aleksandra Broslavskaıa da atalǵan fleshmobqa qosyldy.
«Men óz Qazaqstanymdy, mádenıetimdi, ulttyq kıimderimdi jaqsy kóremin. Munda barlyq adamdarǵa óz ánimnen úzindi jazǵym keledi: «Ne býdet tesno lıýdıam raznyh natsıı, tsvetı moı Kazahstan, tsvetı», - dep jazdy ánshi.
Sonymen birge, jeli qoldanýshysy Andreı Zýbov óz dostaryn fleshmobqa qatysýǵa shaqyrdy.
«Qazaqstandaǵy orystar! Qosylyńyzdar! Aqparattyq soǵysqa Qazaqstannyń kópultty álemin qurtýǵa jol bermeıik. Biz óz Jeruıyǵymyzdy eshqashan satpaımyz! #QazaqstanmenińJeruıyǵym», - deıdi Andreı Zýbov.
«Shanyrak Food» jobasynyń avtory jáne júrgizýshisi Dmıtrıı Kýtsel de naýqan týraly óz pikirin bildirdi.
«Aleksandranyń «Qazaqstan – meniń Jeruıyǵym» fleshmobyn qoldaımyn, ózim Almatyda týyp-óstim. Iá, maǵan orystan shyqqan qazaq termıni unaıdy! Dostarym meni naıman dep ataıdy jáne men ony maqtan tutamyn! Bir-birimizdiń pikirimizdi qurmetteıik, men sizderdiń pikirlerińizdi qurmetteımin, sizder de qurmet tanytyńyzdar, eger kelispeseńiz, ustanymyńyzdy esh qorlaýsyz bildirińiz», - dep jazdy Dmıtrıı Kýtsel.
Instagram jelisiniń Krıstına esimdi qoldanýshysy halyqaralyq oqıǵalarǵa qatysty pikirin bildirdi.
«Kórshi elderde bolyp jatqan sońǵy oqıǵalarǵa baılanysty Reseı bıliginiń túrli ókilderi bizdiń elimizdiń aýmaqtyq tutastyǵy máselelerin qozǵaıtyn beınerolıkter paıda boldy. Osyǵan baılanysty #QazaqstanmenińJeruıyǵym fleshmobyna qoldaý kórsetkim keledi. Biz munda óte jaqsy ómir súrip jatyrmyz, bizdi qutqarýdyń qajeti joq. Oǵan meniń qazaq kúıeýim men ulym dálel», - dep jazdy ol.
Buǵan deıin QR Premer-Mınıstriniń orynbasary – Syrtqy ister mınıstri Muhtar Tileýberdi Reseıdiń Kommýnıstik partııa fraktsııasynyń jetekshisi Gennadıı Zıýganovtyń aıtqan sózine qatysty pikir bildirgen edi.
