Qazaqstan menedjment, ekonomıka jáne boljaý ınstıtýty ýnıversıtet mártebesin aldy
ALMATY. 6 naýryz. QazAqparat - QR Bilim jáne ǵylym mınıstrliginiń sheshimimen Qazaqstan menedjment, ekonomıka jáne boljaý ınstıtýty (QMEBI) ýnıversıtet mártebesine ıe boldy. Bul týraly atalmysh oqý ornynyń baspasóz qyzmeti habarlady.
"Ýnıversıtettiń jańa mártebesi QMEBI-ge álemdik deńgeıdegi joǵary oqý orny jetistikteriniń maqsatyna qaraı qadam basa otyryp, ózimizdiń stýdentterimizge budan da sapaly bilim berýge múmkindik beredi ", - dedi QMEBI Prezıdenti, d-r Chan Ian Beng. Onyń aıtýynsha, Ýnıversıtet mártebesi magıstratýra men doktorantýra aıasyndaǵy bilimdik baǵdarlamalarynyń órisin keńeıtýge múmkindik bermek.
Áleýmettik ǵylymdar fakýltetiniń ekinshi kýrs stýdenti Nursaǵatova Nurgúl: " QMEBI-diń ýnıversıtet bolǵanyna men qatty tolqyp otyrmyn - endi meniń aldymnan budan da kóp múmkindikter ashylmaq jáne meniń dıplomym budan da qundy bolmaq ", - dep óz qýanyshymen bólisti.
Ýnıversıtet qýanyshymen oqý ornynyń áriptesteri men seriktesteri jáne túlekteri quttyqtady.
QMEBI (KIMEP) Ýnıversıteti kommertsııalyq emes joǵary oqý orny. Onyń mıssııasy joǵary bilimdi azamattardy daıyndaý jáne isker ákimshildik pen áleýmettik ǵylymdardyń ár túrli salasynda oqytý, oqý jáne tereń zertteý, sonymen qatar qoǵamdyq paıdaly eńbek júrgizý arqyly Qazaqstan men Ortalyq Azııadaǵy ómir sapasyn jaqsartý bolyp tabylady. Buǵan qosymsha, QMEBI sheteldik stýdentter men oqytýshylardy tartý, basqa eldermen baılanystardy damytý arqyly halyqaralyq qoǵamdastyqqa qyzmet etedi. Oqý orny bıznes, ekonomıka, qarjy, býhgalterlik esep, memlekettik basqarý, saıasattaný, halyqaralyq qatynastar, quqyq, jýrnalıstıka jáne buqaralyq aqparat quraldary salasyndaǵy halyqaralyq deńgeıdegi joǵary jáne joǵary oqý ornynan keıingi bilim berý baǵdarlamalaryn usynady.
