Qazaqstan men Japonııa sý tasqynyna qarsy kúresti kúsheıtý úshin grant bólýge kelisti

ASTANA. KAZINFORM – Sý resýrstary jáne ırrıgatsııa mınıstrligi Japonııa úkimetimen bógetterdi keshendi basqarý arqyly Qazaqstandaǵy sý tasqynyna qarsy sharalardy jaqsartý jobasyn júzege asyrý úshin 2 mln dollar kóleminde grant bólýge kelisti. 

Joba elimizdiń sý tasqynyna tózimdiligin arttyrýǵa jáne bóget qaýipsizdigin nyǵaıtýǵa baǵyttalǵan. Jobanyń aıaqtalý merzimi – 2027 jyl. Eske sala keteıik, byltyr jazda Japonııanyń halyqaralyq yntymaqtastyq agenttiginiń (JICA) sarapshylary tasqyn kezinde eń kóp zardap shekken Qazaqstannyń 4 óńirindegi 13 sý sharýashylyǵy nysanyna zertteý júrgizgen bolatyn. Sondaı-aq JICA qoldaýymen «Qazsýshar» kásipornynyń birneshe mamany Japonııada biliktilikti arttyrý kýrstarynan ótti.

– Sý resýrstary jáne ırrıgatsııa mınıstrligi qurylǵan sátten bastap Qazaqstan men Japonııa arasyndaǵy yntymaqtastyq edáýir nyǵaıdy. Biz yntymaqtastyǵymyzdy jalǵastyrýǵa nıettimiz. Japonııanyń sý tasqynyna qarsy kúreste tájirıbesi mol jáne sý resýrstaryn basqarý salasynda biregeı tehnologııalary bar. Bul elimiz úshin óte paıdaly bolýy múmkin, – dedi Sý resýrstary jáne ırrıgatsııa vıtse-mınıstri Aslan Abdraımov.

Aıta keteıik, Kırov sý qoımasy 58 jyldan keıin alǵash ret kúrdeli jóndeýden ótip jatyr.