Qazaqstan men Japonııa parlamentshileri ekijaqty yntymaqtastyqty keńeıtpek
NUR-SULTAN. QazAqparat - QR Parlament Májilisi Tóraǵasynyń orynbasary Gúlmıra Isımbaeva Japonııa Parlamenti Ókilder Palatasynyń Spıkeri Tadamorı Osımamen kezdesti, dep habarlaıdy Májilistiń baspasóz qyzmeti.
Kezdesý barysynda Gúlmıra Isımbaeva japonııalyq parlamentshige osy jyldyń 23-24 qyrkúıegi aralyǵynda Nur-Sultan qalasynda ótetin Eýrazııa elderiniń parlamentteri spıkerleri IV otyrysyna qatysý úshin resmı shaqyrý hatyn tabys etti.
Óz kezeginde Tadamorı Osıma Qazaqstan Respýblıkasynyń Tuńǵysh Prezıdentine ekijaqty qarym-qatynastardy ornatyp, damytýǵa qosqan eleýli úlesi úshin alǵysyn bildirdi. Sonymen qatar, Japonııa Spıkeri Nursultan Nazarbaevtyń saıası turaqtylyqty qalyptastyrýdaǵy jetistikterine toqtaldy.
Sonymen qatar, Ókilder Palatasynyń Spıkeri Tadamorı Osıma Nursultan Nazarbaevtyń 2016 jylǵy Japonııa Parlamentindegi baıandamasynyń tarıhı mańyzyna, Qazaqstannyń Tuńǵysh Prezıdentiniń Hırosımaǵa jasaǵan sapary týraly aıta kelip, Nursultan Nazarbaevtyń bastamalary men naqty is-áreketteri antııadrolyq qozǵalystyń álemdik kóshbasshysy dep sanaýǵa múmkindik beretinin jetkizdi.
Áńgime barysynda parlamentaralyq yntymaqtastyqty damytý máseleleri talqylandy. Gúlmıra Isımbaeva Japonııanyń sakýra gúldeıtin ýaqytymen jáne Naýryz meıramynyń qundylyqtarynyń uqsastyǵyn atap ótip, Qazaqstan men Japonııanyń parlamentaralyq baılanystary damýdyń jańa serpinine ıe bolatynyn jáne tutastaı alǵanda eki el arasyndaǵy yntymaqtastyqty nyǵaıtatynyna senim bildirdi.
