Qazaqstan men Japonııa ǵylym, bilim salasynda birqatar kelisim jasady
ASTANA. KAZINFORM — Memleket basshysynyń Japonııaǵa resmı sapary aıasynda QR Ǵylym jáne joǵary bilim mınıstri Saıasat Nurbek birqatar kezdesý ótkizip, ǵylym jáne joǵary bilim salasyndaǵy ekijaqty yntymaqtastyqty tereńdetý men keńeıtýge baǵyttalǵan kelisimderge qol qoıdy. Bul týraly Ǵylym jáne joǵary bilim mınıstrligi habarlady.
Qazirgi tańda Qazaqstan men Japonııa arasyndaǵy joǵary bilim salasynda ózara is-qımyldyń negizgi baǵyttaryna stýdentter men professorlyq-oqytýshylyq quramnyń akademııalyq utqyrlyǵy, ózara túsinistik týraly memorandýmdar jasasý, sondaı-aq birlesken bilim berý jáne ǵylymı bastamalardy iske asyrý kiredi.
Sapar aıasyndaǵy mańyzdy oqıǵalardyń biri – QR Ǵylym jáne joǵary bilim mınıstrligi men Azııa-Tynyq muhıty óńirindegi jetekshi joǵary oqý oryndarynyń biri sanalatyn Rıtsýmeıkan Azııa-Tynyq muhıty ýnıversıteti arasynda yntymaqtastyq týraly kelisimge qol qoıylýy boldy. Atalǵan qujat oqytýshylar men stýdentter arasyndaǵy ózara is-qımyldy keńeıtýdi, birlesken ǵylymı-zertteý jobalaryn júzege asyrýdy, ǵylymı semınarlar men konferentsııalar ótkizýdi, sondaı-aq ortaq mádenı is-sharalardy uıymdastyrýdy kózdeıdi.
Sonymen qatar 2026 jyly joǵary bilim salasyndaǵy biliktilikterdi taný jónindegi Azııa-Tynyq muhıty óńirlik konventsııasyn ratıfıkatsııalaý rásimin aıaqtaý josparlanyp otyr. Bul qadam óńir elderi arasyndaǵy akademııalyq utqyrlyqty keńeıtýge jáne dıplomdardy ózara tanýǵa qosymsha múmkindikter beredi.
Kezdesýler barysynda Qazaq ulttyq sý sharýashylyǵy jáne ırrıgatsııa ýnıversıtetiniń bazasynda BUU-nyń sý resýrstary jónindegi habyn ashýdyń mańyzdylyǵy atap ótildi. Habty qurý sý resýrstaryn basqarýda ǵylymı negizdelgen tásilderdi damytýǵa, ınjenerler men basqarýshylardyń jańa býynyn daıarlaýǵa, sondaı-aq ǵylymı zertteýler men memlekettik saıasattyń praktıkalyq qajettilikteri arasyndaǵy baılanysty nyǵaıtýǵa baǵyttalǵan. Bul saladaǵy japon ýnıversıtetterimen jáne Japonııada ornalasqan BUU qurylymdarymen yntymaqtastyq birlesken bilim berý jáne zertteý baǵdarlamalaryn damytý jolyndaǵy mańyzdy qadam retinde qarastyrylady.
Sondaı-aq L.N.Gýmılev atyndaǵy Eýrazııa ulttyq ýnıversıteti men Hitachi High-Tech Europe GmbH kompanııasy arasynda qoldanbaly zertteýlerdi damytý jáne qurylys materıaldaryn taldaý salasyndaǵy yntymaqtastyq týraly memorandýmǵa qol qoıyldy. Qujat Hitachi kompanııasynyń Germanııa men Japonııadaǵy ınfraqurylymyn paıdalana otyryp úlgilerdi baǵalaýdy, EUÝ oqytýshylarynyń qatysýymen birlesken ǵylymı saraptamany, sondaı-aq akademııalyq jarııalanymdardy ázirleýge qoldaý kórsetýdi qamtıdy. Óz kezeginde ýnıversıtet zertteý úlgilerin usynyp, baǵalaý ádistemelerin ázirleýge qatysady jáne Hitachi-diń analıtıkalyq quraldaryn oqý ornynyń zerthanalaryna engizý múmkindigin qarastyrady.
Qol jetkizilgen kelisimderdi iske asyrý Qazaqstan men Japonııa arasyndaǵy ǵylymı-bilim berý seriktestigin nyǵaıtýǵa, akademııalyq utqyrlyqty keńeıtýge, birlesken zertteýlerdi yntalandyrýǵa jáne jahandyq syn-qaterlerdi sheshýge baǵyttalǵan joǵary bilikti kadrlardy daıarlaýǵa úles qosady.
Aıta keteıik, Rıtsýmeıkan Azııa-Tynyq muhıty ýnıversıtetiniń tuńǵysh qazaqstandyq vıtse-prezıdenti Serik Meıirmanov Silk Way telearnasynyń tilshisine bergen suhbatynda Prezıdent Qasym-Jomart Toqaevtyń Japonııaǵa sapary týraly pikir bildirdi.