Qazaqstan men Japonııa ekologııa, taý-ken óndirisi jáne logıstıka salalaryndaǵy yntymaqtastyqty keńeıtýde
ASTANA. KAZINFORM — «Samuryq-Qazyna» tobyna kiretin kompanııalar Memleket basshysynyń Japonııaǵa resmı sapary aıasynda jalpy quny 1,5 mlrd AQSh dollaryn quraıtyn 9 qujatqa qol qoıdy, dep habarlaıdy Kazinform.
«Samuryq-Qazyna» qorynyń Telegram-arnasynyń málimetinshe, Qazaqstan Respýblıkasy Prezıdentiniń Japonııaǵa resmı sapary barysynda «Samuryq-Qazyna» tobynyń kompanııalary men japondyq seriktester arasynda energetıka, qarjy, ekologııa, kólik, taý-ken óndirisi jáne tsıfrlandyrý salalaryn qamtıtyn birqatar strategııalyq mańyzdy kelisimderge qol qoıyldy.
Atap aıtqanda:
– «Samuryq-Qazyna» men Marubeni Corporation arasyndaǵy yntymaqtastyq týraly kelisim;
– «Samuryq-Qazyna» men Total Energies birlesken kásiporny sanalatyn Aktas Energy men Marubeni arasyndaǵy kómirtek kredıtterin shyǵarý, verıfıkatsııalaý jáne ótkizý boıynsha kelisim;
– «Samuryq-Energo» AQ men Mitsubishi Heavy Industries arasyndaǵy aýa sapasyn baqylaýdyń «taza» tehnologııalaryn engizý jónindegi strategııalyq yntymaqtastyq týraly kelisim;
– Jobalardy qarjylandyrý boıynsha MUFG Bank-pen yntymaqtastyq týraly memorandým;
– KEGOC pen Hitachi Energy arasyndaǵy tsıfrlyq tehnologııalardy engizý jónindegi strategııalyq áriptestik týraly kelisim;
– «Qazposhta» AQ men Toshiba Corporation arasyndaǵy qoımalardy basqarý bıznes-protsesterin avtomattandyrý jáne elektrondyq kommertsııany damytý jónindegi kelisim;
– «Qazatomónerkásip» ulttyq atom kompanııasy AQ men Kansai Electric arasyndaǵy yntymaqtastyq týraly qujat;
– «Taý-Ken Samuryq» ulttyq taý-ken kompanııasy AQ men JOGMEC arasyndaǵy Qazaqstan Respýblıkasynyń taý-ken sektoryndaǵy yntymaqtastyq týraly memorandým;
– «Qazaqstan temir joly» ulttyq kompanııasy AQ men RIKEN KOGYO Inc. arasyndaǵy Qazaqstan temir joldaryn jel men qardan qorǵaý salasyndaǵy sheshimderdi ázirleý jónindegi yntymaqtastyq týraly memorandým.
Buǵan deıin habarlanǵandaı, búgin Memleket basshysy Qasym-Jomart Toqaev «Ortalyq Azııa – Japonııa» dıalogynyń alǵashqy sammıtinde sóz sóıledi.
Prezıdent Japonııaǵa resmı sapary aıasynda jalpy somasy 3,7 mlrd AQSh dollarynan asatyn 60-tan astam ekijaqty qujatqa, onyń ishinde kommertsııalyq kelisimderge qol qoıylǵanyn atap ótti.