Qazaqstan men Japonııa birlesken ǵylymı jáne bilim berý jobalaryn damytýǵa nıetti
ASTANA. KAZINFORM — Ǵylym jáne joǵary bilim mınıstri Saıasat Nurbek pen QR Japonııadaǵy Tótenshe jáne ókiletti elshisi Erlan Baýdarbek-Qojataev Tokyo Metropolitan University rektory Takaıa Ohashımen kezdesti.
Kezdesý barysynda joǵary bilim, ǵylym jáne akademııalyq almasýlar salalaryndaǵy Qazaqstan men Japonııa arasyndaǵy yntymaqtastyqty odan ári damytýdyń perspektıvaly baǵyttary jóninde pikir almasty.
Taraptar ýnıversıtetaralyq baılanysty keńeıtýge, birlesken bilim berý jáne ǵylymı-zertteý bastamalaryn iske asyrýǵa erekshe nazar aýdardy. Akademııalyq utqyrlyqty damytý, oqytýshylar men zertteýshiler arasynda tájirıbe almasý, sondaı-aq Qazaqstan men Japonııanyń joǵary oqý oryndary arasyndaǵy tikeleı seriktestik baılanystardy nyǵaıtý múmkindikteri talqylandy. Sonymen qatar kadrlardy birlesip daıarlaý, ǵylymı zertteýler júrgizý jáne ózara qyzyǵýshylyq týdyratyn akademııalyq jobalardy iske asyrý úshin jańa múmkindikter qalyptastyrýdyń mańyzdylyǵy atap ótildi.
Kezdesý barysynda mınıstr Saıasat Nurbek Tokyo Metropolitan University rektoryn bıyl qarasha aıynda Astanada ótetin Strategııalyq seriktester forýmyna qatysýǵa shaqyrdy. Forým yntymaqtastyqtyń perspektıvalaryn odan ári talqylaýǵa jáne Qazaqstannyń jetekshi ýnıversıtetteri men sheteldik joǵary oqý oryndary arasynda jańa seriktestik baılanystar ornatýǵa arnalǵan mańyzdy alań bolmaq.
Kezdesý qorytyndysy boıynsha taraptar akademııalyq jáne ǵylymı ózara is-qımyldy odan ári damytýǵa múddeli ekenin rastap, birlesken bastamalardy praktıkalyq turǵyda iske asyrýǵa jańa serpin berýge daıyn ekenderin bildirdi.
Aıta ketelik Qazaqstan men Japonııa kómirtegi jobalary boıynsha yntymaqtastyqty kúsheıtedi.
