Qazaqstan men Japonııa atom salasyndaǵy yntymaqtastyqty damytý máselesin talqylady
ASTANA.KAZINFORM - Qazaqstan Atom energııasy jónindegi agenttiginiń tóraǵasy Almasadam Sátqalıevtiń Japonııanyń Atom energııasy agenttiginiń (JAEA) prezıdenti Masanorı Kogýchı (Masanori Koguchi) jáne Marubeni Corporation kompanııasynyń ókilderimen kezdesýi ótti.
Kezdesý barysynda taraptar atom energııasyn beıbit maqsatta paıdalaný, ǵylymı-tehnıkalyq zertteýler júrgizý, kadrlar daıarlaý jáne ozyq ıadrolyq tehnologııalardy damytý salalaryndaǵy Qazaqstan men Japonııa arasyndaǵy yntymaqtastyqtyń qazirgi jaı-kúıi men keleshegin talqylady.
Qazaqstannyń ıAdrolyq fızıka ınstıtýty men Ulttyq ıadrolyq ortalyǵynyń japondyq seriktestermen 2002 jyldan beri tabysty yntymaqtastyq ornatyp kele jatqany erekshe atalyp ótti. Bul ózara is-qımyl ǵylymı-tehnıkalyq seriktestikti odan ári keńeıtýge berik negiz qalyptastyryp otyr.
Japon tarapy Qazaqstanmen seriktestikti odan ári nyǵaıtýǵa múddeli ekenin rastady jáne kadrlar daıarlaýǵa, ıadrolyq jáne fızıkalyq ıadrolyq qaýipsizdik salasyndaǵy quzyretti damytýǵa, onyń ishinde Atom energııasy jónindegi halyqaralyq agenttik tetikteri arqyly qoldaý kórsetýge daıyn ekenin bildirdi.
Kezdesý qorytyndysy boıynsha taraptar strategııalyq áriptestikti odan ári keńeıtýge ózara qyzyǵýshylyq tanytatynyn rastady. Sondaı-aq eki eldiń salalyq uıymdary men ǵylymı-zertteý ortalyqtary arasyndaǵy yntymaqtastyqty jandandyrýǵa jáne atom salasyndaǵy jańa birlesken jobalardy pysyqtaýǵa daıyn ekenin jetkizdi.
Aıta keteıik, Prezıdent atom salasyn damytýdyń 2050 jylǵa deıingi strategııasyn bekitti.
