Qazaqstan men Japonııa atom energetıkasy salasynda birqatar ekijaqty qujatqa qol qoıdy

ASTANA. KAZINFORM — Qazaqstan Respýblıkasynyń Atom energııasy jónindegi agenttigi jáne oǵan qarasty uıymdar atom energııasyn beıbit maqsatta paıdalaný salasyndaǵy qazaqstandyq-japondyq yntymaqtastyqty damytýǵa baǵyttalǵan birqatar ekijaqty qujatqa qol qoıdy, dep habarlaıdy Kazinform.

Atom energııasy jónindegi agenttiktiń málimetinshe, qujattarǵa qol qoıý Memleket basshysy Qasym-Jomart Toqaevtyń Japonııaǵa resmı sapary jáne 2025 jylǵy 18-20 jeltoqsan kúnderi ótken «Ortalyq Azııa – Japonııa» formatyndaǵy memleketter basshylary sammıti aıasynda júzege asty.

Taraptar mynandaı qujattarǵa qol qoıdy:

1. Joǵary temperatýraly gazben salqyndatylatyn reaktorlar boıynsha ǵylymı zertteýler men ázirlemeler salasyndaǵy yntymaqtastyq týraly memorandým (Qazaqstan Respýblıkasynyń Atom energııasy jónindegi agenttigi men Japonııanyń atom energııasy agenttigi arasynda);
2. Qoldanbaly zertteýler salasyndaǵy yntymaqtastyqty nyǵaıtý týraly memorandým (Qazaqstan Respýblıkasynyń Atom energııasy jónindegi agenttigi men Japonııanyń atom energııasy agenttigi arasynda);
3. Ǵylymı baılanystardy keńeıtý salasyndaǵy yntymaqtastyq týraly memorandým (Qazaqstan Respýblıkasynyń Ulttyq ıadrolyq ortalyǵy men Marubeni Utility Services Ltd. arasynda);
4. Paıdalanylǵan ıadrolyq otynmen jáne radıoaktıvti qaldyqtarmen jumys isteý salasyndaǵy ózara túsinistik týraly memorandým (Qazaqstan Respýblıkasynyń Ulttyq ıadrolyq ortalyǵy men Muroosystems Corporation arasynda);
5. Atom energııasyn beıbit maqsatta paıdalaný salasyndaǵy ǵylymı zertteýler men ázirlemeler boıynsha ózara túsinistik týraly memorandým (Qazaqstan Respýblıkasynyń Ulttyq ıadrolyq ortalyǵy men Fýkýı ýnıversıtetiniń ıAdrolyq ınjenerııa ǵylymı-zertteý ınstıtýty arasynda);
6. Joǵary temperatýraly gazben salqyndatylatyn reaktor otynyna sáýlelendirý synaǵyn júrgizýdiń tehnıkalyq-ekonomıkalyq negizdemesin ázirleýge arnalǵan kommertsııalyq kelisimshart (ıAdrolyq fızıka ınstıtýty, Japonııanyń atom energııasy agenttigi jáne Marubeni Utility Services Ltd. arasynda).

Qol qoıylǵan qujattar qol jetkizilgen ýaǵdalastyqtardy bekitip, Qazaqstan Respýblıkasy men Japonııa arasyndaǵy atom energııasyn beıbit maqsatta paıdalaný jáne ǵylymı-tehnologııalyq yntymaqtastyq salalaryndaǵy ózara is-qımyldy odan ári keńeıtýge negiz qalaıdy.

Eske salaıyq, búgin Memleket basshysy Qasym-Jomart Toqaev «Ortalyq Azııa – Japonııa» dıalogynyń alǵashqy sammıtinde sóz sóıledi. Memleket basshysy Japonııaǵa resmı sapary aıasynda jalpy somasy 3,7 mlrd AQSh dollarynan asatyn 60-tan astam ekijaqty qujatqa, onyń ishinde kommertsııalyq kelisimderge qol qoıylǵanyn atap ótti.

Sondaı-aq Memleket basshysynyń Japonııaǵa resmı sapary aıasynda «Samuryq-Qazyna» tobyna kiretin kompanııalar jalpy quny 1,5 mlrd AQSh dollaryn quraıtyn 9 qujatqa qol qoıǵany habarlanǵan.