Qazaqstan men Japonııa arasyndaǵy taýar aınalymy bıyl 13,8%-ǵa artqan

ASTANA. KAZINFORM – Roman Sklıar Japonııanyń Qazaqstandaǵy elshisi Djýn ıAmadamen kezdesý ótkizdi, dep habarlaıdy Úkimettiń baspasóz qyzmeti.

Kelissóz aıasynda QR Premer-Mınıstriniń birinshi orynbasary Roman Sklıar eki el arasyndaǵy qarym-qatynastyń joǵary deńgeıde ekendigine toqtalyp, Japonııa Qazaqstannyń halyqaralyq arenadaǵy mańyzdy seriktesteriniń biri ekenin atap ótti.

Onyń aıtýynsha, Qazaqstan Japonııamen ózara qyzyǵýshylyq týdyratyn barlyq salada strategııalyq áriptestikti odan ári keńeıtýge múddeli. Jalpy alǵanda, elder arasyndaǵy yntymaqtastyq kóptegen jyldar boıy dostyq pen ózara túsinistik negizinde qalyptasyp keledi.

Kezdesý barysynda taraptar Qazaqstan-Japonııa ózara is-qımylynyń ózekti máseleleri boıynsha jan-jaqty pikir almasty. Bul rette, Roman Sklıar saýda-ekonomıka jáne ınvestıtsııa salalaryndaǵy baılanystardy odan ári arttyrý qajettigin atap ótti.

Sondaı-aq eki el arasyndaǵy ózara taýar aınalymy ótken jyldyń qorytyndysy boıynsha 13,8%-ǵa artyp, $2,2 mlrd quraǵany atap ótildi.

Kezdesý qorytyndysy boıynsha ekonomıkalyq, áleýmettik jáne basqa da salalarda Qazaqstan-Japonııa qatynastaryn nyǵaıtý boıynsha belsendi jumysty jalǵastyrý týraly kelisimge qol jetkizildi.