Qazaqstan men Japonııa arasyndaǵy taýar aınalymy $1,7 mlrd-tan asty
ASTANA. KAZINFORM – QR Premer-mınıstri Oljas Bektenov Keidanren Japonııa bıznes federatsııasynyń delegatsııasymen saýda-ekonomıkalyq jáne ınvestıtsııalyq yntymaqtastyqty keńeıtý máselelerin talqylady, dep habarlaıdy Úkimettiń baspasóz qyzmeti.
Kezdesýge Mitsui O.S.K. Lines kompanııasy dırektorlar keńesiniń tóraǵasy Takeshı Hashımoto bastaǵan delegatsııa qatysty.
Taraptar Prezıdent Qasym-Jomart Toqaevtyń 2025 jylǵy jeltoqsanda Japonııaǵa resmı sapary barysynda qol jetkizilgen ýaǵdalastyqtardy iske asyrý máselelerin qarastyrdy. Atalǵan sapar aıasynda jalpy somasy 3,7 mlrd dollardan asatyn 47 ekijaqty kommertsııalyq qujatqa qol qoıylǵan.
Oljas Bektenov Japonııa Qazaqstannyń Shyǵys Azııadaǵy negizgi saýda-ekonomıkalyq seriktesteriniń biri ekenin atap ótti. Ótken jyldyń qorytyndysy boıynsha ekijaqty taýar aınalymy 1,7 mlrd dollardan asty.
Qazirgi ýaqytta Qazaqstanda japon kapıtaly qatysatyn 68 kásiporyn jumys isteıdi. Olardyń qatarynda INPEX, Marubeni, Sumitomo, Mitsui jáne basqa da kompanııalar bar.
– Memleket basshysy Qasym-Jomart Toqaevtyń basshylyǵymen elimiz aýqymdy saıası jáne ekonomıkalyq ózgerister kezeńine aıaq basty. Jalpyulttyq referendýmda qabyldanǵan Konstıtýtsııa syndarly halyqaralyq áriptestikke ashyq Ádiletti ári Ozyq Qazaqstandy qurý baǵytyn bekitti. Bul turǵyda Japonııamen ózara is-qımyl biz úshin erekshe mańyzǵa ıe. Biz saýda men ınvestıtsııalardy keńeıtýge ǵana emes, sonymen qatar ekonomıkaǵa jańa tehnologııalar, zamanaýı óndirister men uzaq merzimdi quzyretter ákeletin birlesken jobalardy iske qosýǵa múddelimiz, – dedi Oljas Bektenov.
Óz kezeginde Mitsui O.S.K. Lines kompanııasy dırektorlar keńesiniń tóraǵasy Takeshı Hashımoto Qazaqstan men Japonııa arasyndaǵy yntymaqtastyqty keńeıtýge úlken múmkindik bar ekenin aıtty.
– Qazaqstandaǵy tsıfrlyq transformatsııanyń damý qarqyny erekshe áser qaldyrýda. Biz adamı kapıtaldy damytý, onyń ishinde IT jáne tsıfrlyq transformatsııa salalary úshin joǵary bilikti kadrlar daıarlaý baǵytynda Qazaqstanmen yntymaqtastyqty jalǵastyrýǵa múddelimiz. Japon kompanııalary tsıfrlyq jáne logıstıkalyq ınfraqurylymdy damytýda, sondaı-aq «jasyl» tehnologııalar salasynda yntymaqtastyqty keńeıtýdiń zor áleýetin kórip otyr, – dedi Takeshı Hashımoto.
Kezdesý barysynda Orta dálizdi damytý, Kaspıı teńiziniń porttyq ınfraqurylymyn jetildirý, kólik-logıstıka, energetıka, tsıfrlandyrý, jasandy ıntellekt jáne ónerkásiptik kooperatsııa baǵyttary talqylandy.
Qazaqstan japondyq kompanııalarmen tehnologııalar transferine, óndiristi jergiliktendirýge jáne ekonomıkalyq ósýdiń jańa baǵyttaryn qalyptastyrýǵa arnalǵan birlesken jobalardy júzege asyrýǵa múddeli ekenin jetkizdi.
Keidanren – Japonııanyń eń iri iskerlik birlestikteriniń biri. Onyń quramyna 1574 kompanııa, 106 salalyq qaýymdastyq jáne 47 óńirlik ekonomıkalyq uıym kiredi.
Aıta keteıik, Qazaqstan men AQSh JOO-lary JI men bıotehnologııa salasynda birlesken jobalardy iske asyrady.
