Qazaqstan men Japonııa arasynda tikeleı áýe reısi iske qosylady

ASTANA. KAZINFORM — Qazaqstan men Japonııa arasyndaǵy tikeleı áýe qatynasy qaıta jandanady. 30 qarashadan bastap Air Astana Almaty — Tokıo baǵyty boıynsha aptasyna eki ret turaqty reıs oryndaýdy josparlap otyr. Bul týraly Kólik mınıstrligi málim etti.

Qazaqstan men Japonııa arasynda tikeleı áýe reısi iske qosylady
Foto: Kazinform\JI

IKAO-nyń Áýe kóligi jónindegi jetinshi dúnıejúzilik konferentsııasy (ATConf/7) aıasynda QR Kólik vıtse-mınıstri Talǵat Lastaev pen Japonııanyń Jer, ınfraqurylym, kólik jáne týrızm mınıstrligi Mınıstr hatshylyǵynyń halyqaralyq avıatsııa jónindegi vıtse-mınıstriniń kómekshisi Seıtı Tadzıma myrzanyń kezdesýi ótti.

Kezdesý barysynda taraptar azamattyq avıatsııa salasyndaǵy ekijaqty yntymaqtastyqty odan ári damytý, Qazaqstan men Japonııa arasyndaǵy áýe qatynasyn keńeıtý perspektıvalaryn talqylady, atap aıtqanda, Almaty — Tokıo baǵyty boıynsha tikeleı áýe qatynasyn iske qosý týraly aıtty.

Talǵat Lastaev tikeleı áýe qatynasynyń ashylýy uzaq úzilisten keıin eki el arasyndaǵy kóliktik baılanysty nyǵaıtýdyń mańyzdy kezeńine aınalatynyn jáne iskerlik, týrıstik, ınvestıtsııalyq ári gýmanıtarlyq baılanystardy damytýǵa qosymsha serpin beretinin atap ótti.

2026 jylǵy 30 qarashadan bastap «Air Astana» áýe kompanııasy Almaty — Tokıo (Narıta áýejaıy) baǵyty boıynsha aptasyna eki ret jıilikpen turaqty tikeleı reısterdi oryndaýǵa kirisýdi josparlap otyr. Áýe bıletterin satý aǵymdaǵy jyldyń 2 qazanynan bastap ashyldy.

Ushýlar Airbus A321LR áýe kemelerimen oryndalady. Áýe kompanııasynyń kestesine sáıkes ushý uzaqtyǵy Almaty — Tokıo baǵyty boıynsha shamamen 7 saǵat 30 mınýtty jáne keri baǵytta 9 saǵat 25 mınýtty quraıdy.

Reısterdi iske qosý eki el arasyndaǵy áýe tasymalynyń qoljetimdiligin arttyrýǵa, týrıstik saparlar men iskerlik baılanystar úshin qosymsha múmkindikter jasaýǵa, sondaı-aq Qazaqstannyń Ortalyq Azııadaǵy mańyzdy avıatsııalyq jáne tranzıttik hab retindegi rólin nyǵaıtýǵa baǵyttalǵan.

Áńgime barysynda qazaqstandyq tarap áýe qatynasyn odan ári keńeıtýge jáne eki eldiń ulttyq áýe tasymaldaýshylary arasyndaǵy ózara is-qımyldy damytýǵa múddelilik bildirdi.

Kezdesýdiń jeke taqyryby IKAO sheńberindegi yntymaqtastyq boldy. Talǵat Lastaev japon tarapyn Tosııýkı Onýma myrzanyń IKAO Keńesiniń Prezıdenti laýazymyna saılanýymen quttyqtap, bul oqıǵanyń Japonııa men búkil Azııa-Tynyq muhıty óńiri úshin mańyzdylyǵyn atap ótti. Uıym tarıhynda alǵash ret atalǵan óńirdiń ókili IKAO Keńesine basshylyq etip otyr.

Vıtse-mınıstr álemdik azamattyq avıatsııanyń qaýipsizdigin, ornyqty damýyn qamtamasyz etý jáne tıimdiligin arttyrý maqsatynda Qazaqstan men Japonııanyń avıatsııalyq vedomstvolary arasyndaǵy belsendi dıalogty qoldaýdyń, sondaı-aq halyqaralyq alańdardaǵy ózara is-qımyldy odan ári nyǵaıtýdyń mańyzdylyǵyna toqtaldy.

Aıta keteıik, buǵan deıin Qytaıdyń taǵy eki qalasyna Qazaqstannan tikeleı ushýǵa bolatynyn jazdyq.