$940 mln: Qazaqstan men Japonııa 17 ónerkásiptik jobany iske asyryp jatyr
ASTANA. KAZINFORM - QR Ónerkásip jáne qurylys mınıstri Ersaıyn Naǵaspaev Japonııanyń Ekonomıka, saýda jáne ónerkásip vıtse-mınıstri Kenjı ıAmadamen kezdesti. Kezdesý barysynda ınvestıtsııalyq ózara is-qımyl jáne ónerkásiptik kooperatsııa salasyndaǵy áriptestik máseleleri talqylandy.
Qazaqstan Respýblıkasy Prezıdenti Qasym-Jomart Toqaevtyń 2025 jylǵy jeltoqsanda Tokıoǵa jasaǵan memlekettik sapary aıasynda qol jetkizilgen ýaǵdalastyqtardy iske asyrýǵa erekshe nazar aýdaryldy. Taraptar barlyǵy $3,7 mlrd-tan astam somanyń 60 kommertsııalyq kelisimine qol qoıdy, onyń ishinde óndiriske ozyq japonııalyq tehnologııalar men sheshimderdi engizýge baǵyttalǵan sharttar da bar.
-Qazaqstan Japonııamen strategııalyq áriptestikti joǵary baǵalaıdy. Sońǵy jyldary ekonomıka, ónerkásip jáne ınvestıtsııalar salalaryndaǵy qarym-qatynasymyz aıtarlyqtaı nyǵaıdy. Búginde ónerkásiptik kooperatsııa aıasynda jalpy somasy shamamen $940 mln bolatyn 17 birlesken joba iske asyrylýda, onyń 10-y sátimen paıdalanýǵa berildi. Yntymaqtastyqtyń jańa baǵyttary belsendi túrde pysyqtalýda. Biz barlyq ınvestıtsııalyq jobalardy iske asyrýǵa jan-jaqty qoldaý kórsetýge daıynbyz, – degen Ersaıyn Naǵaspaev bıylǵy jeltoqsanda Astanada ótetin Qazaqstan men Japonııa arasyndaǵy Ekonomıkalyq yntymaqtastyq jónindegi úkimetaralyq komıssııanyń 9-shy otyrysynyń mańyzdylyǵyna toqtaldy.
Kezdesý qorytyndysy boıynsha ekijaqty áriptestikti odan ári damytý jóninde ýaǵdalastyqtarǵa qol jetkizildi.
Osyǵan deıin Ersaıyn Naǵaspaev 2030 jylǵa deıin óńdeý ónerkásibinde 478 joba iske qosylatynyn aıtqan bolatyn.
