Qazaqstan men Vetnam «Orta dáliz» arqyly júk tasymalyn jedeldetpek
ASTANA. KAZINFORM — Premer-mınıstrdiń orynbasary — ulttyq ekonomıka mınıstri Serik Jumanǵarın Vetnam Sotsıalıstik Respýblıkasy Premer-mınıstriniń turaqty orynbasary Ngýen Hoa Bınmen kezdesti. Bul týraly Úkimettiń baspasóz qyzmeti habarlady.
Kelissóz barysynda 30 jyldan asa ýaqyt ishinde Qazaqstan men Vetnam arasynda saıası dıalog dáıekti túrde damyp, úkimetaralyq jáne parlamentaralyq ózara is-qımyl nyǵaıyp kele jatqany atap ótildi. Serik Jumanǵarınniń aıtýynsha, eki el kóshbasshylary eń aldymen saýda, ınvestıtsııa, kólik jáne logıstıka, AÓK jáne aqparattyq tehnologııa salasyndaǵy yntymaqtastyqty odan ári tereńdetýdiń naqty baǵytyn belgiledi. Qazaqstan 2026 jylǵa qaraı ózara taýar aınalymyn eki ese arttyrýǵa nıetti. Osy jyldyń ortasynda Vetnamǵa saýda-ekonomıkalyq mıssııa jiberýge daıyn.
Qazaqstan segiz jylda alǵash ret Vetnamǵa 15 myń tonnadan astam bıdaı eksporttaǵany atap ótildi. 2025 jyly konteınerlerdi shamadan tys júktemeı, mýltımodaldy logıstıkany paıdalana otyryp, qazaqstandyq astyqtyń alǵashqy tikeleı aralas jetkizilimi iske asyryldy. Bul jetkizý merzimi men shyǵyndy azaıtty.
Atalǵan tájirıbe Qazaqstannyń ońtústik-shyǵys Azııa elderine azyq-túliktiń senimdi jetkizýshisi retindegi mańyzdy qadamy retinde qarastyrylyp otyr.
Eksporttyq áleýetti un, et, sút ónimi, sondaı-aq maıly daqyl esebinen arttyrýǵa bolady.
Osyǵan baılanysty qazaqstandyq tarap veterınarııa salasyndaǵy yntymaqtastyq týraly kelisimdi jandandyryp, oǵan aýyl sharýashylyǵy jónindegi kishi komıtettiń ekinshi otyrysy kezinde qol qoıýdy usyndy.
Kólik-logıstıka salasynda vetnamdyq áriptesterge Ońtústik teńiz baǵytymen salystyrǵanda júk jetkizý merzimin 3-4 ese qysqartýǵa múmkindik beretin Transkaspıı halyqaralyq kólik baǵyty («Orta dáliz») ınfraqurylymyn keńinen paıdalaný týraly aıtyldy. Qazaqstan ońtaıly logıstıkalyq jaǵdaı jasaýǵa, birlesken jobalardy, onyń ishinde jeńil ónerkásip pen avtomobıl jasaýdy damytýǵa daıyn ekendigin bildirdi.
Sondaı-aq 2026 jyly Hanoı — Almaty — Praga baǵyty boıynsha VietJet Air turaqty reısin iske qosý josparlanyp otyr. Osyǵan baılanysty Astana men Hanoı arasynda tikeleı áýe qatynasyn ashý, sondaı-aq Almaty — Hoshımın reısin qalpyna keltirýdi qarastyrý usynyldy.
Eki el arasyndaǵy ınvestıtsııalyq yntymaqtastyq jańasha damý ústinde. Qazaqstanda Vetnam kapıtalynyń qatysýymen birqatar joba, sonyń ishinde Almaty oblysynda Ak Bulak Village týrıstik kesheni men Qonaev qalasynyń «Arna» ındýstrııalyq aımaǵynda ınvestıtsııa kólemi $90 mln bolatyn azyq-túlik óndirý zaýytynyń qurylysy iske qosylýda.
Taraptar saýda-ekonomıkalyq jáne ǵylymı-tehnıkalyq yntymaqtastyq jónindegi Úkimetaralyq komıssııanyń sheshýshi rólin atap ótip, onyń kezekti otyrysyn bıylǵy maýsym-shildede ótkizýdi qarastyrmaq. Sondaı-aq bıyl Qazaqstan-Vetnam iskerlik keńesin qurý týraly memorandýmǵa qol qoıylady.
Ngýen Hoa Bın Qazaqstan men Vetnam arasyndaǵy dástúrli dostyqty atap ótip, aımaqaralyq ózara is-qımyldy qosqanda, yntymaqtastyqty odan ári keńeıtýge múddeli ekenin jetkizdi. Ol «Orta dálizdi» damytý jónindegi bastamalardy qoldap, sondaı-aq Hoshımınde qarjy ortalyǵyn qurýǵa oraı, «Astana» halyqaralyq qarjy ortalyǵyn damytý jónindegi qazaqstandyq tájirıbeni zerdeleýge qyzyǵýshylyq bildirdi.
Kezdesý qorytyndysynda vetnamdyq tarap Qazaqstan-Vetnam iskerlik keńesiniń qurylýyn qoldady. Bul úshin ózara saýda kólemin odan ári arttyrýda eleýli áleýet bar.
Aıta ketelik keshe Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ınflıatsııany turaqtandyrý máseleleri boıynsha keńes ótken edi.