Qazaqstan men Vetnam mádenı baılanystardy jańa deńgeıge kótermek
ASTANA. KAZINFORM — Vetnamdaǵy Qazaqstan mádenıeti kúnderi aıasynda Qazaqstan Respýblıkasy Premer-mınıstriniń orynbasary – Mádenıet jáne aqparat mınıstri Aıda Balaeva Vetnam Sotsıalıstik Respýblıkasy Premer-mınıstriniń orynbasary Fam Thı Than Chamen kezdesti. Kezdesý barysynda eki el arasyndaǵy yntymaqtastyqty odan ári damytýdyń perspektıvaly baǵyttary talqylandy. Bul týraly vedomstvonyń baspasóz qyzmeti málim etti.
— Búginde elderimiz arasyndaǵy qarym-qatynas jańa kezeńge qadam basty. Ótken jyly Qazaqstan men Vetnam arasyndaǵy baılanystar strategııalyq áriptestik deńgeıine kóterildi. Bul saıası jáne ekonomıkalyq yntymaqtastyqpen qatar, mádenı-gýmanıtarlyq yqpaldastyqty da odan ári tereńdetýge mol múmkindik beredi. Biz Vetnamdaǵy mádenı jáne kreatıvti ındýstrııalardyń damýyn úlken qyzyǵýshylyqpen baqylap otyrmyz. Osy oraıda kınematografııa, oryndaýshylyq óner men mádenı týrızmnen bastap, mádenı murany saqtaý, dástúrli qolóner jáne zamanaýı dızaın salalaryna deıingi birqatar baǵyt boıynsha ózara yntymaqtastyqtyń áleýeti zor ekenin kórip otyrmyz. Bul salalardaǵy tájirıbe almasý ekijaqty baılanystarymyzǵa tyń serpin beretinine senimdimin, — dedi Aıda Balaeva.
Taraptar dástúrli qolónermen, jergilikti salt-dástúrlermen jáne ulttyq taǵamdarmen tanysý, sheberlik sabaqtary men shyǵarmashylyq baǵdarlamalarǵa qatysý arqyly saıahatshylardy eldiń mádenı ortasyna etene aralastyrýdy kózdeıtin kreatıvti týrızm salasyndaǵy yntymaqtastyqqa erekshe nazar aýdardy.
Sonymen qatar Aıda Balaeva kınematografııa salasyndaǵy baılanysty jandandyrýdy usyndy. Atap aıtqanda, eki eldiń kıno aptalyqtaryn ótkizý, Qazaqstan men Vetnam kınematografısteriniń festıvalderge qatysý aıasyn keńeıtý, eki memlekettiń aýmaǵynda kıno túsirilimderin uıymdastyrý jáne birlesken kınojobalardy júzege asyrý máseleleri sóz boldy.
Qazaqstan men Vetnamnyń mádenı mura nysandaryn, tarıhı qalalaryn, mýzeılerin, qolóner ortalyqtaryn, festıvalderi men zamanaýı mádenı keńistikterin qamtıtyn keshendi týrıstik baǵyttardy birlesip ázirleý de perspektıvaly bastamalardyń biri retinde ataldy.
Kezdesý qorytyndysy boıynsha taraptar ózara yqpaldastyqty odan ári nyǵaıtýǵa jáne birlesken bastamalardy ilgeriletýge múddeli ekenin bildirdi.
Aıta ket eıik, buǵan deıin Qazaqstan men Vetnam «Orta dáliz» arqyly júk tasymalyn jedeldetetinin jazdyq.
