Qazaqstan men Vetnam arasyndaǵy saýda-ekonomıkalyq yntymaqtastyq qarqyndy damyp keledi — Prezıdent

ASTANA. KAZINFORM — Qazaqstan men Vetnam arasyndaǵy saýda-ekonomıkalyq jáne ınvestıtsııalyq yntymaqtastyq qarqyndy damyp kele jatyr. Bul týraly Aqordada elimizge memlekettik saparmen kelgen Vetnam Kommýnıstik partııasy Ortalyq Komıtetiniń Bas hatshysy To Lam joǵary deńgeıdegi kelissóz barysynda Memleket basshysy Qasym-Jomart Toqaev aıtty.

Qazaqstan Prezıdenti eń aldymen elimizge memlekettik saparmen kelgen mártebeli meımanǵa rızashylyǵyn bildirip ótti.

— Muny eń aldymen qazaq-vetnam yqpaldastyǵyn odan ary nyǵaıtýǵa degen nıettiń aıqyn kórinisi dep baǵalaımyn. Vetnam — Qazaqstannyń Azııadaǵy senimdi seriktesi. Elderimizdiń damýy jolyndaǵy maqsat-mindetteri de uqsas. Vetnamnyń 2040 jylǵa deıin ekonomıkasy damyǵan álemdegi ozyq 25 memlekettiń qataryna kirýge degen talpynysyn tolyq qoldaımyz. Bul rette kúsh jumyldyryp, birlesip, áreket etýge daıynbyz, — dedi Memleket basshysy.

Qasym-Jomart Toqaev qazirgi ýaqytta Qazaqstan men Vetnam arasyndaǵy saýda-ekonomıkalyq jáne ınvestıtsııalyq yntymaqtastyq qarqyndy damyp kele jatqanyna nazar aýdartty. 

— Biz az ýaqyt ishinde birqatar iri jobany júzege asyrdyq. Aldaǵy ýaqytta da ózara tıimdi baılanystarymyzdy keńeıtýge tolyq negiz bar. Sizdiń osy tarıhı saparyńyz jáne sonyń aıasynda qol qoıylatyn qujattar qazaq-vetnam qatynastaryn odan ary kúsheıtýge tyń serpin beredi, — dedi Prezıdent.

Buǵan deıin Vetnam premer-mınıstriniń orynbasary, syrtqy ister mınıstri Býı Than Shon Kazinform agenttigine eksklıýzıv suhbat berip, Qazaqstan-Vetnam qarym-qatynasynyń jaı-kúıi jaıly egjeı-tegjeıli aıtyp bergen edi. 

Sondaı-aq, keıingi 30 jyldan astam ýaqytta eki el baılanysy qalaı nyǵaıdy? Kazinform analıtıkalyq sholýshysy osy taqyrypty taldap kórgen bolatyn.