Qazaqstan men Vengrııa yntymaqtastyǵynyń áleýeti zor - Elbasy
ASTANA. QazAqparat - Qazaqstan men Vengrııa saıası-ekonomıkalyq jáne mádenı-gýmanıtarlyq baılanystardy strategııalyq seriktestik aıasynda damytýǵa yqylasty.
Búgin Aqordada Elbasy Nursultan Nazarbaev birqatar eldiń elshilerinen senim gramotalaryn qabyldaý kezinde osylaı málim etti.
«Qazaqstan men Vengrııany halyqtarymyzdyń ortaq tarıhy men mádenıeti baılanystyrady. Eki el de saıası-ekonomıkalyq jáne mádenı-gýmanıtarlyq baılanystardy strategııalyq seriktestik aıasynda damytýǵa yqylasty. Vengrııa Premer-mınıstri Vıktor Orbannyń bıylǵy saparynyń qorytyndysyn da joǵary baǵalaımyz. Kelissózder Qazaqstan-Vengrııa yntymaqtastyǵynyń áleýeti zor ekenin kórsetti»,-dedi Prezıdent.
Óz kezeginde senim gramotalaryn tapsyrý rásiminen keıin Vengrııanyń Tótenshe jáne Ókiletti Elshisi Andrash Baranı eki eldiń qarym-qatynastary strategııalyq seriktestik deńgeıine shyqqandyǵyn atap ótti.
«Meniń Qazaqstandaǵy jumysym kezinde Astanada mańyzdy «EKSPO-2017» kórmesi ótkeli tur. Bizdiń el osy aıtýly sharaǵa qatysatyndyǵyn rastady. Sondyqtan bul baǵytta tyǵyz qarym-qatynasta jumys isteımiz»,-dedi ol.
