Qazaqstan men Vengrııa tikeleı ınvestıtsııalyq qor qurdy
ASTANA. QazAqparat - Agroónerkásiptik keshenge tikeleı ınvestıtsııalardy kóptep tartý maqsatynda bastapqy kapıtalızatsııasy 40 mıllıon dollardy quraıtyn Qazaq-Venger tikeleı ınvestıtsııalyq qory quryldy, dep habarlaıdy QazAqparat.
Bul týraly «QazAgro» ulttyq basqarýshy holdıngi» AQ Basqarma tóraǵasynyń orynbasary Gúlnaz Atamqulova Ortalyq kommýnıkatsııalar qyzmetinde ótken baspasóz máslıhatynda habarlady.
«Agroónerkásiptik keshendi damytýǵa baǵyttalǵan memlekettik mindetterdi iske asyrý úshin «QazAgro» holdıngi ınvestıtsııalardy kóptep tartý baǵytynda aýqymdy jumys jasap keledi. Tikeleı ınvestıtsııalar qorlar - agroónerkásiptik keshenge tikeleı ınvestıtsııa tartýdyń bir túri. Osy oraıda bastapqy kapıtalızatsııasy 40 mıllıon dollardy quraıtyn birlesken Qazaq-Venger tikeleı ınvestıtsııalyq qory bul baǵyttaǵy tuńǵysh bastama bolyp otyr», - dedi Gúlnaz Atamqulova.
Atalǵan Qor agroónerkásiptik kesheniniń iske asyrylǵan, biraq qarjy tapshylyǵyn tartyp otyrǵan jobalaryn damytýdy, sondaı-aq mal, qus, jemis-kókónis, balyq sharýashylyqtary, sút óndirisi, dándi jáne maıly daqyldardy, aýyl sharýashylyǵy tehnıkasyn qurastyrý baǵytyndaǵy jańa jobalardy qarjylandyrýdy kózdeıdi. Sondaı-aq qosymsha ınvestorlardy tartý arqyly Qor kapıtalızatsııasynyń kólemin 150 mıllıon dollarǵa deıin ulǵaıtý josparlanǵan.
2017 jyldyń 25 tamyzynda Astanada ótetin «AgroInvest Forum 2017» agroónerkásiptik ınvestıtsııalyq forýmynda Qazaq-Venger qorynyń Aqtóbe oblysyndaǵy jylyjaı kesheni jobasyn iske asyrý boıynsha alǵashqy kelisim bekitiledi. Odan bólek, tikeleı ınvestıtsııalyq qor aıasynda Aqmola oblysynda sút taýarlary fermasy men mıneraldy tyńaıtqyshtar zaýyty jobalary qarastyrylǵan.
Sonymen birge, holdıng ókilderiniń málimdeýinshe, Qazaqstannyń aýyl sharýashylyǵy sektoryn damytý úshin «QazAgro» holdınginiń enshiles kompanııalary da sheteldik kapıtaldardy tartýda baryn salýda. Osynyń nátıjesinde sońǵy 5 jylda Holdıng jáne onyń enshiles kompanııalary agroónerkásiptik keshen salasyna jalpy kólemi 375 mıllıard teńgeden asatyn sheteldik ınvestıtsııany tartyp úlgergen.
«Qazirgi tańda 10 jylǵa 100 mıllıon evro alý úshin Eýropalyq ınvestıtsııalyq bankimen kelissózder júrgizilýde. Bul qarjy Qazaqstan Respýblıkasynyń agrarlyq sektoryndaǵy klımattyń ózgerýi men jalpy tıimdilikti arttyrý, aýyldyq mıkro, shaǵyn jáne orta kásiporyndardy damytý jáne jeke kásipkerlik sýbektileriniń kishi jáne orta jobalaryn júzege asyrýda járdemdesý boıynsha jobalardy qarjylandyrýǵa jumsalady», - dep óz sózin túıindedi G.Atamqulova.
