Qazaqstan men Vengrııa saýda yntymaqtastyǵyn keńeıtedi
Mınıstrliktiń baspasóz qyzmetinen málim etkendeı, Tımýr Súleımenov pen Vengrııa vıtse-premeri-qarjy mınıstri Mıhaı Varga Býdapeshte ótken Qazaqstan-Vengrııa iskerlik keńesiniń ekinshi otyrysyna qatysty.
«Qazaqstan Vengrııanyń TMD elderiniń ishindegi eń basty áriptesi bolyp tabylady. Astana-Býdapesht tikeleı áýe reısi ashylǵaly beri 40 myńnan astam jolaýshy «Wizz Air» vengr áýe tasymaldaýshysynyń qyzmetin paıdalanǵan. «MOL Group» munaı-gaz kompanııasy 10 jyldan asa ýaqyttan beri qazaqstandyq naryqta tabysty jumys isteýde», - dedi vıtse-premer.
Mıhaı Varga sondaı-aq 2019 jylǵy kóktemde bıznesmender delegatsııasyn Qazaqstanǵa jiberý josparlanyp otyrǵanyn jetkizdi.
Óz kezeginde UEM basshysy Vengrııanyń joǵary tehnologııalyq jáne aýylsharýashylyq kompanııalaryn EAEO naryǵyna erkin qol jetkize alatyn jáne Qytaımen shekaralasatyn Qazaqstanǵa ınvestıtsııa salýǵa shaqyrdy. Mınıstr vengrııalyq áriptesterimiz ben bıznesmenderdi Qazaqstannyń ekonomıkalyq damýy jáne ınvestıtsııalyq múmkindikteri týraly habardar etti. Tımýr Súleımenov Qazaqstannyń tranzıttik áleýetiniń zor múmkindigin aıryqsha atap ótti. Doing Business reıtıngi, AHQO, iskerlik jáne ınvestıtsııalyq ortadaǵy iske qosylǵan sharalar men josparlar vengrııalyq bıznesmenderdiń erekshe qyzyǵýshylyǵyn týǵyzdy.
Mınıstr sondaı-aq eki el ýnıversıtetterinde oqyp jatqan stýdentterdiń mańyzdy róline, eki memlekettiń arasyndaǵy saýda-ekonomıkalyq baılanysty odan ary tereńdetýge nazar aýdardy.
Vengrııa taraby qazaqstandyq stýdentter úshin granttar sanyn 200-den 250-ge arttyrý jospary týraly aıtty.
Budan bólek, Tımýr Súleımenov Vengrııa Syrtqy ister jáne syrtqy saýda mınıstri Peter Sıııartomen kezdesti. Ol Qazaqstandaǵy EYDU sheńberindegi jumystar, aqparattyq tehnologııalar, qurylys, energetıka, qarjy, aýyl sharýashylyǵy, týrızm jáne basqa da salalardaǵy yntymaqtastyqtyń bolashaǵy týraly áńgimeledi.
Sonymen qatar, Vengrııa syrtqy saıasat vedomstvosynyń basshysy Túrki keńesiniń sheńberindegi yntymaqtastyqty keńeıtý josparymen bólisti. Sıııarto Vengrııanyń Qazaqstan azamattaryna Shengen aımaǵynda vızasyz rejım belgileýge múddeli ekendigin jetkizdi. Sondaı-aq vengrııalyq mınıstr «Wizz Air» Astana men Býdapesht baǵyty boıynsha 2019 jylǵy qańtardan naýryzǵa deıin aptasyna eki reıstiń ornyna aptasyna bir reısti júzege asyratynyn habarlady. Naýryzdyń sońynan bastap, áýe tasymaldaýshy burynǵy kestege qaıta kóshedi.
Budan basqa, UEM basshysy «iCell», «Býdapesht sý arnasy» jáne «Creatio» kompanııalarynyń basshylarymen kezdesti. «iCell» el aýmaǵynda tranzıttik kólikke arnalǵan aqyly avtojol júıesin engizýdiń tabysty tájirıbesimen tanystyrdy. Aıta keterligi, kompanııanyń satý jónindegi menedjeri Aqan Jumabaev óz tanystyrylymyn qazaq tilinde bastady. Ol Vengrııada bakalavrıat jáne magıstratýra bitirgen. Qazirgi ýaqytta júıeni Qazaqstanǵa tartý máselesimen aınalysýda. Kompanııa sondaı-aq salyq jınaý, mobıldik tólemderdi basqarý júıesi, aqyly kólik qoıatyn oryndar boıynsha jumystardy jolǵa qoıǵan.
