Qazaqstan men Vengrııa qos dıplomdy magıstratýra baǵdarlamasyn iske qosty

ASTANA. KAZINFORM — Qazaqstan men Vengrııa joǵary oqý oryndary sý resýrstaryn basqarý jáne sý dıplomatııasyna basymdyq berilgen qos dıplomdy magıstratýra baǵdarlamasyn iske qosty. Bul týraly Sý resýrstary jáne ırrrıgatsııa mınıstrligi málim etti.

Memleket basshysynyń halyqqa Joldaýynda aıtylǵan sý dıplomatııasy salasyndaǵy bilikti mamandardy daıarlaý tapsyrmasyn júzege asyrý aıasynda Qazaq ulttyq sý sharýashylyǵy jáne ırrıgatsııa ýnıversıteti vengrııalyq Korvınýs ýnıversıtetimen birlese jumys istep jatyr.

Osy yntymaqtastyq nátıjesinde «Sý resýrstaryn basqarý jáne sý dıplomatııasyna basymdyq» berilgen qos dıplomdy magıstratýra baǵdarlamasy ázirlenip, iske qosyldy.

Budan bólek, bıyl tamyz aıynda Eýropalyq komıssııa Erasmus Mundus Design Measure baǵdarlamasy aıasynda 60 000 eýro kóleminde grant bóldi. Bul grant sý resýrstary men sý dıplomatııasy boıynsha ıntegratsııalanǵan birlesken magıstratýra baǵdarlamasyn ázirleý úshin Eýropanyń úsh jáne Ortalyq Azııanyń tórt ýnıversıtetinen quralǵan konsortsıýmǵa, onyń ishinde QazUSShIÝ-ge berildi. Qazan aıynyń sońynda Býdapesht qalasynda konsortsıým sarapshylarynyń alǵashqy otyrysy ótedi. Aldaǵy 15 aı ishinde olar tolyq ázirlengen baǵdarlamany Eýropalyq komıssııanyń qaraýyna usynýy tıis. Eger baǵdarlama maquldansa, jalpy bıýdjeti 5 mln eýrony quraıtyn, al uzaqtyǵy alty jylǵa sozylatyn magıstratýra baǵdarlamasyn birlesip júzege asyrý bastalady.

Sarapshylardyń alǵashqy otyrysynda sondaı-aq sý resýrstaryn basqarý jáne sý dıplomatııasy jónindegi Birlesken ortalyq qurý usynylady. Bul ortalyqtyń bas keńsesi Taraz qalasyndaǵy QazUSShIÝ-de ornalasady.

— Birlesken magıstratýra baǵdarlamasy ortaq sý resýrstaryn birlese basqarýdyń zamanaýı tujyrymdamalaryn qamtıdy. Atap aıtqanda, paıda úlestirý, halyqaralyq yntymaqtastyq teorııasy, sýdyń saıası ekonomıkasy jáne janjaldardy taldaý sekildi baǵyttar qarastyrylady. Baǵdarlama stýdentterge ekijaqty, aımaqtyq jáne jahandyq deńgeıdegi kelissózderdi tıimdi júrgizýge qajetti praktıkalyq daǵdylardy úıretedi, —dedi ýnıversıtet rektory Kámshat Túsipova. 

Sondaı-aq QazUSShIÝ bazasynda ǵylymı mektepterdi qurý jáne damytý maquldandy. Atap aıtqanda, sý resýrstary ınjenerııasy mektebi, sýmen jabdyqtaý jáne sanıtarııa mektebi, aýyl sharýashylyǵy sýy jáne ırrıgatsııa júıelerin basqarý mektebi, gıdrologııa, ekologııa jáne qorshaǵan orta mektebi, sáýlet jáne logıstıka mektebi, energetıka mektebi, memlekettik basqarý saıasaty jáne menedjment mektebi, qashyqtan zondtaý jáne jasandy ıntellekt mektebi.

— Sý resýrstary jáne ırrıgatsııa mınıstrligi qurylǵan sátten bastap basqa da ýákiletti organdarmen birlese otyryp, sý salasyndaǵy kadrlyq áleýetti arttyrý boıynsha keshendi jumystar júrgizip keledi. Qazirgi tańda sý salasyndaǵy mamandyqtar boıynsha shamamen 2500 stýdent bilim alyp jatyr. 2024 jyly sý sharýashylyǵy kásiporyndarynda praktıkadan ótken stýdentter sany 82 bolsa, 2025 jyly bul kórsetkish 450-ge jetti. Sonymen qatar otandyq joǵary oqý oryndary sý dıplomatııasy salasyndaǵy mamandardy daıarlaý baǵdarlamalaryn engizip jatyr, — dedi Sý resýrstary jáne ırrıgatsııa mınıstri Nurjan Nurjigitov.

Aıta keteıik, buǵan deıin vıtse—mınıstr Nurlan Aldamjarov Ógem ózeniniń sýyn el ıgiligine paıdalaný jobasy ázirlenip jatqanyn aıtqan bolatyn.