Qazaqstan men Venesýela týrızm jáne sport salasyndaǵy yntymaqtastyqty nyǵaıtady
ASTANA. KAZINFORM - Týrızm jáne sport mınıstri Ermek Marjyqpaev Bolıvar Venesýela Respýblıkasynyń elshisi Rosalba Lo Býe Antıkomen kezdesti.
Kezdesýde taraptar týrızm jáne sport salasyndaǵy ekijaqty yntymaqtastyqty damytý perspektıvalaryn talqylady. Vedomstvo basshysy venesýelalyqtardy ótken Táýelsizdik kúnimen quttyqtap, eliniń odan ári órkendeýin tiledi.
«Elderimizdiń týrıstik áleýeti óte zor. Degenmen, týrıstik aǵyn kórsetkishteri aıtarlyqtaı tómen deńgeıde ekenin baıqap otyrmyz. Statıstıka derekteri boıynsha 2023 jyly Qazaqstanǵa 243 venesýelalyq týrıst kelse, Qazaqstan azamattary Venesýelaǵa saparlamaǵan», – dep atap ótti Ermek Marjyqpaev.
Mınıstr bul jaǵdaı tikeleı reısterdiń bolmaýyna jáne vızalyq qıyndyqtarǵa baılanysty ekenin atap ótti.
«Týrıstik aǵyndy ulǵaıtý jáne yntymaqtastyqty odan ári damytý úshin osy máselelerdi muqııat pysyqtaý qajet», - dedi E.Marjyqpaev.
Sondaı-aq mınıstr Parıjde ótetin Olımpıadada sheteldik sportshylarǵa jaqsy nátıje kórsetýine tilektes ekenin jetkizdi. Óz kezeginde elshi hanym sport jáne týrızm salalarynda yntymaqtastyqty nyǵaıtýǵa yqpal etetin birqatar bastama men jobalardy aıtty. Ózara is-qımyldyń naqty baǵyttary kórsetiletin salalyq vedomstvolar arasyndaǵy ekijaqty qujattarǵa qol qoıýdy usyndy.
Kezdesý barysynda Ermek Marjyqpaev elshiden Venesýela sportshylaryn 8-13 qyrkúıek aralyǵynda elordada ótetin 5-shi Dúnıejúzilik kóshpendiler oıyndaryna qatysýǵa qolǵabys etýin surady.
Kezdesý sońynda Ermek Marjyqpaev Venesýelanyń týrıstik kompanııa ókilderin 2025 jyly Qazaqstanda ótetin «Týrızm jáne Saıahat» halyqaralyq kórmesine qatysýǵa shaqyrdy.
