Qazaqstan men Vetnam quqyqtyq kómek máselesin retke keltirdi
NUR-SULTAN. QazAqparat - Búgin Parlament Senatynyń jalpy otyrysynda «Qazaqstan Respýblıkasy men Vetnam Sotsıalıstik Respýblıkasy arasyndaǵy qylmystyq ister boıynsha ózara quqyqtyq kómek týraly shartty ratıfıkatsııalaý týraly» Zańy qabyldandy, dep habarlaıdy QazAqparat tilshisi.
Atalǵan shartqa 2017 jyldyń 15 maýsymynda Hanoıda qol qoıyldy. «Shart qylmystyq ister boıynsha quqyqtyq kómek kórsetý máselelerin retteıdi, sondaı-aq jasalǵan qylmys turǵysynda kúdiktiniń kinásin dáleldeýge qajetti tergeý amaldaryn júrgizý eskerilgen. Jalpy, bul shart standartty qujat bolyp sanalady», - dedi QR Bas prokýrorynyń orynbasary Andreı Lýkın.
Shartpen mynadaı quqyqtyq kómek kórsetý túrleri qarastyrylady: qujattardy tapsyrý; kýáni, sarapshyny shaqyrý; dáleldemeler men aıǵaqtar alý jáne berý, onyń ishinde beınekonferentsııa nemese televızııa baılanysy arqyly dáleldemeler alý; qylmystyń kiristerin anyqtaý men tárkileý jóninde sharalar qabyldaý; aqparat almasý. Qujatty ratıfıkatsııalaý eki eldiń qylmyspen kúrestegi yntymaqtastyǵynyń tıimdiligin arttyrady.
«Osyndaı sharttar 27 elmen bekitilgen. Qazirgi kezde mundaı qujattarǵa Kýbamen, Grekııamen jáne Makedonııamen arada qol qoıý pysyqtalýda», - dedi A. Lýkın.
Onyń sózine qaraǵanda, Vetnammen yntymaqtastyq aıtarlyqtaı belsendi damyp keledi. Bul memleket Ońtústik-Shyǵys Azııada biz úshin tartymdy elderdiń biri bolyp otyr, ıaǵnı ekonomıkalyq turǵyda baılanystar nyǵaıtylýda. Ótken jyly eki el arasynda saýda aınalymy 500 mln AQSh dollarynan astam qarjyny qurady. Búginde Qazaqstan men Vetnam arasynda tikeleı áýe reısteri ashylǵan.
