Qazaqstan men Vetnam arasyndaǵy ınvestıtsııalyq ahýal jaqsara túspek - Májilis
ASTANA. 15 qańtar. QazAqparat - Búgin Palata Tóraǵasy Nurlan Nyǵmatýlınniń jetekshiligimen ótip jatqan Parlament Májilisiniń jalpy otyrysynda palata depýtattary «Qazaqstan Respýblıkasynyń Úkimeti men Vetnam Sotsıalıstik Respýblıkasynyń Úkimeti arasyndaǵy Investıtsııalardy kótermeleý jáne ózara qorǵaý týraly kelisimdi ratıfıkatsııalaý týraly» zań jobasyn maquldady.
Kelisimniń maqsaty ınvestorlarǵa qoldanystaǵy zańnamada kózdelgennen tys qosymsha kepildikterdi qamtamasyz etý arqyly ózara ınvestıtsııalarǵa qatysty ınvestıtsııalyq ahýaldy jaqsartý bolyp tabylady. Bul rette kelisim salyq salýǵa, memlekettik satyp alýǵa, ýaǵdalasýshy tarap bergen sýbsıdııalarǵa nemese granttarǵa qoldanylmaıdy. «Qujat ınvestorlardy qoldaý jáne ózara qorǵaý úshin qolaıly quqyqtyq sharttar qurýǵa, ınvestıtsııalyq klımatty jaqsartýǵa jáne eki el arasyndaǵy qolaıly saýda-ekonomıkalyq yntymaqtastyqty damytýǵa baǵyttalǵan. Kelisim eksproprıatsııa, ulttandyrý, ınvestorǵa ótemaqy tóleý jáne daýlardy sheshýge qatysty normalardy qarastyrady. Sonymen birge, zań jobasy Taraptar arasyndaǵy daýlardy sheshý maqsatynda uıymdastyrylǵan halyqaralyq tórelik sottardy qalyptastyrý rásimin egjeı-tegjeıli retteıtin erejelerdi qamtıdy», - deıdi Ekonomıka jáne bıýdjettik josparlaý mınıstri Erbolat Dosaev.
Eske sala keteıik, Kelisimge Vetnamnyń Premer-Mınıstri Ngýen Tan Zýńtyń Qazaqstanǵa resmı sapary sheńberinde 2009 jyly 15 qyrkúıekte Astana qalasynda qol qoıylǵan.
