Qazaqstan men Vetnam arasyndaǵy ınvestıtsııalardy ózara qorǵaý týraly kelisim qabyldandy - Parlament
ASTANA. QazAqparat - Búgin QR Parlamenti Senatynyń jalpy otyrysynda «Qazaqstan Respýblıkasynyń Úkimeti men Vetnam Sotsıalıstik Respýblıkasynyń Úkimeti arasyndaǵy Investıtsııalardy kótermeleý jáne ózara qorǵaý týraly kelisimdi ratıfıkatsııalaý týraly» QR Zańyn qabyldady.
Kelisimge Vetnamnyń Premer-Mınıstri Ngýen Tan Zýńtyń Qazaqstanǵa resmı sapary sheńberinde 2009 jyly 15 qyrkúıekte Astana qalasynda qol qoıylǵan.
Kelisimniń maqsaty ınvestorlarǵa qoldanystaǵy zańnamada kózdelgennen tys qosymsha kepildikterdi qamtamasyz etý arqyly ózara ınvestıtsııalarǵa qatysty ınvestıtsııalyq ahýaldy jaqsartý bolyp tabylady. Bul rette kelisim salyq salýǵa, memlekettik satyp alýǵa, ýaǵdalasýshy tarap bergen sýbsıdııalarǵa nemese granttarǵa qoldanylmaıdy.
Budan bólek, qujat ınvestorlardy qoldaý jáne ózara qorǵaý úshin qolaıly quqyqtyq sharttar qurýǵa, ınvestıtsııalyq klımatty jaqsartýǵa jáne eki el arasyndaǵy qolaıly saýda-ekonomıkalyq yntymaqtastyqty damytýǵa baǵyttalǵan. Kelisim eksproprıatsııa, ulttandyrý, ınvestorǵa ótemaqy tóleý jáne daýlardy sheshýge qatysty normalardy qarastyrady. Sonymen birge, zań Taraptar arasyndaǵy daýlardy sheshý maqsatynda uıymdastyrylǵan halyqaralyq tórelik sottardy qalyptastyrý rásimin egjeı-tegjeıli retteıtin erejelerdi qamtıdy.
